Ramma ni hpe Covid-19 ana hte seng nna wunkat jaw
Covid-19 Ana Zinli Makawp Ninghkap Komiti kaw nna woi awn nhtawm, Je Yang, Woi Chyai hpyen yen camp kaw na apnawng ramma ni hpe Covid-19 ana hte seng nna, Ginjaw Hkamja Dap kaw wunkat jaw ai lam hpe April shata 17 hte 18, 2 ya galaw na re lam chye lu ai.
Wunkat hta Covid-19 ana hte seng nna shani shagu shale ai Mungkan a mabyin masa lam ni, Covid-19 ana a lam, ana makawp maga lam hpe tatut jai lang ra ai lam ni, tsi gat, tsi gayau ai ladat ni, tinang ginra shara kata kaw tinang nan jen jep ai lam galaw wa ai ten hta gara hku galaw ra na lam ni hte ra rawng ai lam, ahkyak ai lam ni nga wa yang galoi mung mahkri shawn hkridun chye na lam ni hpe sharin ya ai re.
Ana hte seng nna wunkat jaw ai yaw shada lam hpe Covid-19 Ana Zinli Makawp Ninghkap Komiti a tatut woi awn komiti amu madu Dr. Nangzing Bawk Wa ya na zawn tsun ai.
“Ginjaw komiti a masing hpe tatut hkrang shapraw ai hku re. Shanhte kaw ramma 70, 100 daram Volunteer hku makan bungli kata kaw apnawng gunhpai lu na matu machye machyang lu u ga, ndai wunkat hpe galaw ai re. Ndai bungli kaw gaw hkamja dap, asuya magam dap ni sha galaw yang gaw masha n-gun nlaw ai majaw, ramma ni a n-gun hpe lu jai lang yang gaw grau kaja na re” nga nna tsun ai.
Wunkat hta Je Yang hte Woi Chyai camp kaw na ramma ni marai 20 sa du sharin hkamla nga ai rai nna, ndai ramma ni gaw tinang dabang kata sha n-ga, asuya kaw na matut hpaw sa wa na quarantine dabang ni hta tatut apnawng na ramma ni re.
Covid-19 ana makawp wunkat hte seng nna pang 2 galaw ngut sai hta shawng ningnan na pang gaw Laiza Muklum kata na ramma ni rai nna, pang 2 gaw, Mai Ja Yang Htoi Ningshawng jawng na ramma ni hte Sinpraw Majoi kaw na ramma ni re hte pang 3 ngu na wunkat hpe gaw Je Yang hte Woi Chyai camp kaw na ramma ni hpe sharin ya ai re lam chye lu ai.
