Ramma ni hpe Covid-19 ana makawp maga tsi gat ai lam hte seng nna wunkat jaw

Manmaw Buga Hkalup Hpung Ramma Komiti ni woi awn nna, April shata 24 ya shani Roberts Jawng Lyon Ginra kaw Manmaw buga ramma ni hpe Covid-19 makawp maga tsi gat, tsi gayau ai ladat ni hpe sharin ya ai lam chye lu ai.

“Tsi gat ai pung hpe gara hku jai lang ra na, tsi hpe gara hku gayau ra na, buhpun palawng hpe gara hku buhpun sumraw ra na, ngu ai lam ni hpe ta tut hta chye jai lang wa lu na matu, yaw shada let sharin ya ai re” nga nna, Ramma Komiti Hpu-Awn Lahtaw Zau Mung Du tsun ai.

Ndai lang gaw Manmaw buga ramma komiti ni a shawng ningnan lang na wunkat re, chye mayu sharin hkamla mayu ai ni nga yang matut sharin ya ai lam mung nga na re lam, Shadang Zau Mung Du matut tsun ai.

Wunkat hta sharin ya ai ni gaw, ya aten tatut bungli shang taw nga ai ramma ni marai 11 kawn sharin ya ai rai nna, sa du sharin hkamla ai ramma ni yawng marai 8 re hpe chye lu ai.

Ra mara hta jai lang ai arung arai ni hpe gaw, Kachin State Covid-19 Prevention Network kawn garum jaw ai rai nna, ramma ni a lusha hpe gaw buga hpung masha ni madi shadaw garum ya nga ai re.

Manmaw Buga Hkalup Hpung Ramma Komiti ni gaw, ta tut hta magam bungli shang taw nga ai wuhpung majaw, quarantine tawn da ai shara shagu hte hpyi lajin wa ai buga shagu ni hta sa du tsi gat ya na re hpe mung chye lu ai.