Ramma ni hpe ningmu jahpaw sharin hpawng galaw
Mungmyit Sinli Ga (Kachin Sub-state), Muse Wunpawng Htunghking Manau Wang kaw, January shata 22 ya shani kaw nna January shata 24 ya shani du hkra 3 ya tup, Ninggawn Institute ni woi awn nhtawm ramma ni hpe ningmu jahpaw ai sharin hpawng galaw ai lam chye lu ai.
Sharin sara ni gaw Ninggawn Institute a Lit Hkam Sara Lahpai La Ja hte gaka kaw na shaga da Sara ni rai nna, Basic concept of human rights, Sex and Gender equality, Democracy ndai ga baw masum hpe sharin ya ai re.
“Ramma ni hpe ningmu jahpaw ya ai, dai ni na masa hta ramma ni gara hku lu shang lawm mai ai lam, dai ni gaw anhte Dimocracy hte gayin wa ai re majaw, anhte na mungdan masa lam ni hpe chye da mai ai lam ni hpe chye hkra ningmu jahpaw ai lam ni galaw ai re, anhte Mungmyit Sinli Ga de gaw kaga hpu nau ni hte rau jawm nga ai re majaw, hpu nau shada da mung grau nna, mahkri shawn magyep kap wa lu na matu yaw shada ai hte fellowship lamang hku mung re” nga nna Ninggawn Institute a Lit Hkam Sara Lahpai La Ja tsun ai.
Ninggawn Institute a yaw shada lam gaw ramma ni hpe hpaji lam de lu madi shadaw hkra, maga mi de ramma ni hpe kan bau bungli hte seng nna mahkrun ni tam ya ai zawn re ni, ramma ni hpe madung dat nna galaw taw nga ai re lam, Sara matut tsun ai.
Sharin hpawng hta Wunpawng ramma ni, Balawng (Ta-ang) ramma ni, Miwa ramma hte Sam ramma ni yawng marai 35 tup, sa du sharin hkamla ai lam chye lu ai.
