Rawt malan mungga hpe madi shadaw ai mungshawa hkrumzup hpawng galaw

Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw Kaba Nban La a (60) ning hpring rawt malan munga hpe madi shadaw ai mungshawa hkrumzup hpawng hpe February shata 9 ya jahpawt 9:00am aten hta, Ginjaw Hkamja Dap, Wunjat Gawknu kaw galaw la lu sai re.

Hpawng hta, Du Up Daju Maran Zau Tawng (Ginjaw Komiti Salang) kaw nna Wunpawng Mungdan Shanglawt Kongsi Ningbaw Kaba a (60) ning hpring rawt malan mungga hpe mahta nna, tsun jahpra dan ai lam galaw ai hta, Myen amyu ni a amyu kaba lai len hte hpyen gumshen magam lai len a nga nga dingsa rawt malan ai bungli hpe matut nna galaw sa wa ra na re, Wunpawng Mungdan Shanglawt Hpung gaw, Asuya a hkrang langai byin hkra Magam Dap, Makan Dap, lakung lakap ni hpe jinghkum gawgap taw nga ai re, ndai lam ni hpring tsup wa ai shani hta, Asuya langai mi hku nna ngang ngang tsap lu hkra galaw sa ra ai re lam tsun ai.

Du Up Daju Nbang Bum Sin Wa (Ginjaw Komiti Salang) kaw nna mung, hpa majaw rawt malan ra ai ngu ai hpe tsun jahpra dan ai lam galaw ai hta, Myen hpyen gumshen magam ni gaw, hpu shawng hpu ba ni hte jahkrup da ai hpe nhkan shatup ai sha, amyu kaba gumshen magam lai len hte anhte amyusha ni hpe dip sha dang sha wa ai majaw rawt malan ra ai re lam, Wunpang amyusha ni hta mung myutsaw mungtsaw myit gaw grai rawng ai hkrai re raitim, myutsaw myit rawng ai hta, anhte a pandung shadaw du lu na matu apnawng shakut shaja ai gaw ahkyak dik ai re lam tsun ai.

Ningbaw Kaba Nban La a (60) ning hpring rawt malan mungga madi shadaw ai hkrumzup hpawng hta, Mungdan Hkamja Dap magam gun ni yawng marai 130 daram sa du shanglawm ai lam chye lu ai.