Rawt malan mungga madi shadaw ai mungshawa hkrumzup hpawng galaw
Laiza Muklum Htunghking Manau Wang, Sinpraw Majoi Gawknu kaw February shata 10 ya jahpawt 10:00am aten hta, Ningbaw Kaba Nban La a (60) ning hpring rawt malan mungga hpe madi shadaw ai, hpaji jaw tsun jahpra sanglang ai mungshawa hkrumzup hpawng galaw la lu sai re.
Mungga hpe madi shadaw ai mungshawa hkrumzup hpawng galaw ai lam gaw, mungchying mungshawa ni hte magam gun ni yawng shawng de na hta, grau myitsu myit hprang wa nna, Ginjaw Komiti kaw nna woi awn ai hte maren, hkan nang hkan sa madat mara let, shanglawt lu ai bandung shadaw de du wa lu hkra myit hkrum ai hte galaw sa yang awngdang ai de du wa lu na matu yaw shada ai re lam chye lu ai.
Hkrumzup hpawng hta, Sara Kaba Sumlut Gam (Ginjaw Komiti Tingnyang Up Malai (II)) kaw nna Ningbaw Kaba a rawt malan mungga hpe madi shadaw tsun hpaji jaw sanglang ai lam galaw ai re.
Salang Kaba Lama Gum Hpan (Ginjaw Komiti Salang) kaw nna mung rawt malan labau hte seng nna tsun madi shadaw sanglang ai lam galaw ai re.
Hpawng hta, Laiza Muklum kata shanu nga ai mungchying mungshawa ni yawng marai 245 sa du madat hkam la ai re.
Ya na zawn mungga madi shadaw sanglang hpawng ni hpe Woi Chyai Camp, Dai Lawn Rung hte KIO uphkang ginra kata shanu nga ai mungchying mungshawa ni hpang de Ginjaw Komiti Salang ni kaw nna sa du tsun jahpra dan ai lam galaw nga dingyang re hpe chye lu ai.
