Rep chywi hpung jat sharin wunkat yu hpawng galaw
Wunpawng Mungdan Shanglawt Asuya, Amyu Shayi Hpung Ginjaw kaw nna lit la sharin ya ai rep chywi hpung jat wunkat yu hpawng hpe Laiza Muklum Htunghking Rida Shapan Ginra kaw August shata praw 4 ya shani hkying 10:00am aten kaw nna hkying 12:00pm aten laman galaw la lu sai lam chye lu ai.
Rep chywi hpung jat wunkat hpe June shata praw 5 ya shani kaw nna shata 2 tup sharin ya ai lam, wunkat hta num/la yawng hpye mai ai nhpye hte nhpye kasha hpan hkum chywi ai hpaji ni hpe sharin ya ai re lam chye lu ai.
Rep chywi hpung jat wunkat hta Woi chyai, Hpun Lum Yang, Je Yang, Laiza kaw na amyu shayi sha ni marai 10 sa du sharin hkamla ai rai nna, Rep chywi hpaji hpe hpyen yen tsin yam hkrum nga ai amyu shayi sha ni a matu madung dat yaw shada ai lam, KWA Rung, DPP True Projet Lithkam Saranum Gazum Ying Myaw ya na zawn tsun dan ai.
“Magam gun nna dawn jan yak hkak ai dinghku ni, majan a majaw effected byin mat ai mare ni ga shadawn Laiza, Ja htu kawng zawn re ni, dai hta grau nna asak naw kaji ai aten hta jawng nlu lung mat ai, jawng pru mat ai numsha ni hpe madung shanhte ni rep chywi hpaji hpe chye la nna kan bau bungli lu galaw wa na, shanhte hkum shanhte lu tsap wa na matu madung yaw shada ai re” nga nna tsun ai.
Jawng yu hpawng hta Amyu shayi ningbaw Hpawmi Nangzing Kaw Hpang kaw nna jawng yu shatsam mungga shaga ai hte hpawng lamang hta saw shaga da ai myitsu kanu kawa ni, jawngma ni yawng marai 30 jan sa du shanglawm ai lam chye lu ai.
Matut nna Ningpawt Ninghpang Rep chywi sharin wunkat hpe Maga Yang, Sha-it Yang, Woi Chyai, Laiza, Je Yang, Hpun Lum Yang hte Dum Bung hpyen yen dabang kaw na amyu shayi marai 15 hpe August shata praw 5 ya shani mying hkap la nhtawm, August shata praw 7 ya shani kaw nna shata 3 tup sharin sa wa na re hte ya na zawn rep chywi hpaji sharin ya ai lam hpe pang hte pang matut manoi galaw sa wa na matu hkyen lajang da ai lam nga ai re hpe mung matut chye lu ai.
