Rev. Bima Dau Lum hte Sara Sumlut Tu Htang yan hpe Pyada dap kaw nna htawng de htawt sit
Myitkyina Jaw Bum kaw WMR ni woi awn galaw ai (60) lang na rawt malan ninghtoi wunli sharawt akyu hpyi hpawng hta shang lawm ai Jaw Bum Lit Hkam Rev. Bima Dau Lum hte Myitkyina Ginwang Ramma Hpa-awn Sara Sumlut Tu Htang yan hpe February shata 11 ya shani hkying 11:30am ten hta pyada dap kaw nna Myitkyina hkyuk htawng de htawt sit kau ai lam chye lu ai.
“Pyada dap kaw 5, 6 ya nga sai re majaw pyada ni mung shanhte a galaw ang ai magam bungli hte maren grai na hkra nmai tawn da ai majaw htawng de shara bai htawt sit ai lam re” nga nna WMR kaw na amyu shayi ningbaw Saranum Ah Sar Mi tsun dan ai.
February praw 8 ya shani pru wa lu na matu tsun da ai raitim, Taing Mu ni nrau mat ai majaw, Sara yan hpe pyada dap kaw sha naw woi tawn ai re. Sara yan hpe tara masat kade hte ahkyak la da ai gaw anhte nchye shi ai. Taing Mu hte lu hkrum na matu anhte shakut taw nga ga ai, Taing Mu gaw February shata 13 ya shani rau na re nga nna tsun ai re majaw, Taing Mu hte lu hkrum jang gaw ndai bungli ngut mat na re ngu myit mada nga ga ai, nga nna Saranum matut tsun ai.
Sara yan hpe woi mat ai lam gaw February shata praw 5 ya shani Jaw Bum kaw galaw ai (60) lang na rawt malan ninghtoi wunli sharawt akyu hpyi hpawng hta dazik nkap ai hpyen bu hpun palawng hte sinat kaja nre ai hpe hpai nna, gamung naura hkrang shala ai lam, shanglawt hpyen la sumla V 9 ni hpe shakap da ai hte shana na alu tam yungwi pinra lamang ni galaw lai wa sai re.
WMR kaw nna mung laika shapraw da sai raitim, ya aten du hkra Sara yan hpe tara masat kade hte ahkyak la da ai lam hpe seng ang ai Myen Hpyen Dap hte Balik Dap kaw nna sang lang dan ai lam n galaw shi ai rai nna, ndai amu hte seng nna Wunpawng Mungbawng Rapdaw (WMR), Jinghpaw Wunpawng Hkalup Hpung Ginjaw (KBC), Simsa Lam Akyu Galaw Hpung (PCG) ni hku nna Myen Hpyen Dap hte bawngban nga dingyang re hpe mung chye lu ai.
