Rev. Dr. Hkalam Samson hpe gumshem Myen hpyen ni htawng 6 ning jahkrat

KBC a hpaji jaw Sara kaba Rev. Dr.Hkalam Samson hpe gumshem Myen hpyen dap a tara rung ni, April shata praw 7 ya jahpawt hkying 10:00am aten hta Myitkyina hkyukhtawng kaw nna, tara kanu 3 hte htawngdam 6 ning jahkrat dat sai lam chye lu ai.

Rev. Dr.Hkalam Samson hpe gumshem Myen hpyen dap kawn ပုဒ်မ ၁၇ (၁) hte 2 ning, ပုဒ်မ ၅၀၅ (က) hte 1 ning ပုဒ်မ ၅၂ (က) hte (3) ning yawng pawng 6 ning jahkrat dat sai lam chye lu ai.

Sara kaba gaw lai wa sai 2022 ning December shata praw 5 ya shani hta Thai Mungdan, Bankok de tsi tsi hkam la na matu hkawm sa wa ai ten hta Mandalay, nbung li daru kaw gumshem Myen hpyen ni rim woi da ai shata mali na ai hpang, htawngdam jahkrat dat hkrum ai rai nga ai.

Rev. Dr. Hkalam Sam Son gaw KBC a Amu Madu magam lit hpe 8 ning, Ningbaw magam lit hpe 4 ning apnawng gunhpai lai wa sai rai nna, ya aten du hkra, hpaji jaw magam lit hpe naw gunhpai nga ai re hpe mung chye lu ai.