Rim hkrum ai SGZ magam gun sara ni hte ramma ni marai 14 hpe bai dat ya

March shata praw 1 ya shani Lashu Balik Dap hte Myen Hpyen Dap ni a lata kaw mara nnga rim hkrum ai Sammung Ginwang (SGZ) magam gun sara ni hte ramma ni yawng marai 14 hpe lit nga ai hpung woi sara ni hte tara kasa ni kaw nna sa tsun jahkrup ai majaw, March shata praw 2 ya shana maga hkying 3:30pm aten daram hta bai dat ya sai lam na chye lu ai.

Rim woi hkrum ai magam gun sara ni hte ramma ni bai lawt wa sai raitim, shanhte hpe Myen hpyen la ni hte Balik hpyen la ni kaw nna san jep adup zingri ai lam galaw ai re hpe na chye lu ai.

Ya na zawn mara nnga rim hkrum ai lam gaw, Lashu mare kaw na hkristan hpung ni kaw nna hkristan dawnghkawn ni hte Gum shem ai Myen Hpyen Dap Asuya hpe ninghkap n-gun madun ai lam galaw ai hte Jinghpaw Wunpawng ramma ni kaw nna mung, lam amyu myu hku shanglawm ai re, dai hpe shanhte nra sharawng ai majaw masa amyu myu hku nna mara tam ai lam rai na re ngu mu mada ai nga nna, buga hpung sara langai tsun ai.

March shata praw 1 ya shani galaw ai Gum shem ai Myen Hpyen Dap Asuya hpe ninghkap shawa n-gun madun ai ni gaw, Balik ni hpe hprawng yen ai nga nna, SGZ jawng wang htum pa hkahkawng hku wang de hprawng shang nna, Balik la langai mi hpe mung rim nhtawm, kara doi (kadung) zen kau ya nna bai dat ya ai lam nga ai hte Ginwang rung kaw n-gun madun ai ni shang rawng taw ai ngu hku nna Ginwang magam gun sara ni hte online laika sharin nga ai ramma ni hpe rim woi mat ai lam re lam chye lu ai.

Ya aten rim hkrum ai sara ni hte ramma ni hpe lit nga ai hpung woi ni, tara kasa ni hte lit nga ai salang ni kaw nna sa tsun jahkrup ai marang e rim hkrum ai sara ni hte ramma ni yawng bai lawt pru wa sai lam, buga hpung sara langai tsun shana wa ai kaw na chye lu ai.