Rim lu ai Ka-ni nanghpam hpe wan nat jahten
Photo Credit; Lahpai Awng Naw
Na Lung ninghtawn kata na Shadan pa mare hta mungshawa yawng kasi la koi gam lu na matu Myen gumhpaw sen lahkawng tsa daram manu nga ai nanghpam lu sha hpe June shata 17 ya shani hta wan nat jahten ai lam galaw ai re hpe mare masha ni shana wa ai kaw nna chye lu ai.
Ndai nanghpam lu sha ni gaw lai wa sai May shata 25 hte 26 ya shani hta lu rim ai rai nna, Kani Hpraw hte Yama Sapya kawk (10), atawng apa re ai chyawk kasha ni mung grai lawm ai re hpe chye lu ai.
“Anhte ndai hku galaw shamu shamawt nna lu zing la ai nanghpam ma hkra hpe gaw shawa daw tsa yawng a man hta dan dawng hkra, wan nat jahten sharun let shadan shadawng ai lam re hte hkang zing la lu ai nanghpam ni hpe gara kaw tawn kau ai kun ngu ntsen nhten ai lam nbyin hkra shawa daw tsa yawng a man hta galaw ai lam re” nga nna Shadan Pa mare Salang Lahpai Awng Naw tsun ai.
Shadan Pa mare kaw nanghpam malu masha hte seng nna, Myen mung Asuya kawn laja lana ahkyak la ya ai lam nnga ai re majaw, Shadan Pa pat jasan hpung ni hku nna sha, dut ginlen sha taw ai ni hpe sawk sagawn tam la nna, mare kata kaw na kalang ta gawt shapraw kau ai hku daw dan hparan ai re lam salang wa matut tsun dan ai.
Nanghpam lu sha dut shalai ai marai (8), lu sha ai marai (52) hte yawng marai (60) tup hpe mung lu rim da ai re. Ya aten hta mare salang ni, mungshawa ni yawng a man e nanghpam lu sha hpe wan nat jahten sharun kau nna, dut sha ai ni hpe gaw mare kata kaw na gawt shapraw kau ai lam, lu sha ai ni hpe gaw bungli dam, shingna dam galaw shangun nna wa kau shangun sai lam, lit nga ai Salang ni tsun dan ai kaw na chye lu ai.
