Roi rip zingri sat hkrum ai saranum yan a (7) ning ladu hkrum myit dum akyu hpyi hpawng galaw

Photo by KBC Kachin

KBC laika hpaji sasana hta apnawng daw jau nga ai saranum Maran Lu Ra hte saranum Tangbau Hkawn Nan Tsin yan hpe roi rip zingri sat hkrum ai (7) ning ladu hkrum myit dum akyu hpyi hpawng hpe January shata 19 ya shani Myitkyina Jaw Bum hta KBC ginjaw kaw nna, woi awn galaw ai lam chye lu ai.

“Maroi nni matai htang ai nju ndawng ai myit hte gasat yang hpang jahtum anhte sum na, hkam sharang ai myit hte gasat ga, laknak lang na gasat ai ngu gaw shut ai nre raitim, laknak lang ai ngu kata kaw si mani ai ngu lawm ai, mungkan a tara naw hkan ra ai, dai tara gaw si mani ai re. Dai majaw saranum yan a mahtai hpe lu hkra gasat ai shaloi hkam sharang ga, saranum yan a bungli gaw majan langai hku sa ra bungli re dai majaw anhte hkam sharang ga, ginjaw kaw na galaw ai gaw shayawm wa ra na re, ginwang de buga ni galaw ra na lam law law nga wa na re” nga nna KBC Ningbaw Rev. Dr. Hkalam Samson nawku hpawng mungga hta tsun ai.

KBC ginjaw kaw na ndai mabyin manghkang hpe jaw kaja ai mahtai lu hkra matut lit la woi awn galaw sa wa na re lam, Rev. Dr. Hkalam Samson matut tsun ai.

Nawku hpawng hta COVID-19 ana zinli a majaw shawoi shaning na zawn shawa masha law law hte nlu galaw ai raitim, Wunpawng Mungbawng Rapdaw (WMR) kaw na sa du ai kanu kawa ni, ginwang hkan na kanu kawa ni, shiga hpe na nna du sa ai kanu kawa ni sa du shang lawm ai lam chye lu ai.

Saranum yan hpe lai wa sai 2015 ning January shata 19 ya shana hta Mungmyit Sinli Ga (Kachin Sub-state), Mungmau ginwang Namtau buga Kawnghka mare kaw shan nga ai nta kaw mazut roi rip sat hkrum ai re.