Sabaw buga hpung hkalum chyeju shakawn hpawng galaw
Uru Sengmaw Ginwang, Sabaw Buga Hkalup Hpung buga hkalum chyeju shakawn akyu hpyi hpawng lamang hpe Sabaw mare kaw March shata praw 3 ya shani galaw ai lam chye lu ai.
“Sabaw mare hta laiwa sai 1990 ning kaw na 1998 ning du hkra Sabaw mare hkristan hpawng chyawm nawku wa ai, 1998 ning February shata 22 ya shani kaw nna Seng Tawng buga a mare hpung langai hku nna Seng Tawng buga Sabaw mare hkalup hpung gaw de wa ai hta 2020 ning January shata hta galaw ai Uru Sengmaw Ginwang a dawdan komiti hpawng hte kasa hpawng hta Ginwang kaw nna buga hpung langai hku masat ya sai re majaw, Sabaw Buga hpung hkalum chyeju shakawn akyu hpyi hpawng galaw ai re” nga nna Sabaw Buga Hpung kaw na Sara Seng Myat Naw tsun ai.
Laiwa sai ten hta gaw kanu buga rai nga ai Seng Tawng buga kaw shang lawm wa ai rai nna Sabaw mare hta mung, mare hpung hku nna kaba wa ai sasana magam bungli hta buga hpung langai hku rawt tsap nna galaw yang grau dam lada ai hku daw jau ai magam bungli hta masan sa awng dang ai hku maden jat wa lu na re majaw, buga la yang mai sai ngu nna Ginwang kaw buga hpyi shawn ai hte maren ginwang kaw na buga masat ya sai re majaw, buga hkalum poi galaw ai marang e Karai Kasang a wunli hkamla lu na matu galaw re lam, Sara Seng Myat Naw matut tsun ai.
Chyeju shakawn hpawng hta Uru Sengmaw Ginwang kata na ni nawn ai nawku hpung masha ni, Sabaw mare kaw nga ai kaga nawku makam masham hpung masha ni hte Sabaw buga hpung masha ni yawng marai 300 jan sa du shang lawm ai, Sabaw Buga hpung hta hpung htinggaw 100 tup nga ai re hpe chye lu ai.
