Sadung, Bum Tawng kaw nga ai Myen Hpyen Dap ni mare kata hkan shang jep nna mungshawa ni a gumhpraw mya la
Sadung Bum Tawng kaw dap jung shara jahkrat nga ai Myen Hpyen Dap Hk.M.Y (385) kata na hpyen la ni Pan Se Ninghtawn Machyang mare kaw gat sa mari ai mungshawa la marai (9) hpe rim woi mat wa nna, san jep ai lam galaw nhtawm, gumhpraw mya la ya ai lam nga ai hpe buga masha ni shana wa ai kaw na chye lu ai.
Ndai mungshawa ni gaw Hkun Nawng mare kata na mungshawa ni rai nna, Lanam ta hta lang ra ai arung arai ni hpe gat nga ai Machyang mare kaw sa mari nga ai ten, shanglawt asuya a masha ni re nga nna rim woi mat ai re lam, buga masha langai ya na zawn tsun dan ai.
“Shanglawt Asuya a arung arai sa mari ai ni re nga nna shanhte hpyendap de rim woi mat ai. Ndai ni gaw hpyen magam gun ni nre, galoi mung arung arai sa mari nga ai mungshawa ni re ngu tsun tim rim woi mat ai. Maram yu yang gumhpraw hpyi sha mayu nna re ngu mu ai” nga nna tsun ai.
Rim woi hkrum ai mungshawa ni gaw Pan Se ninghtawn Hkun Nawng mare kata na Salang Lahpai Gu Lay, Salang Zaw Wu, Salang Bu Yi, Salang Gu Si, Shadang Ngwa Tar, Shadang Zaw Paw, Shadang Zaw Lu, Shadang Ngwa Cha hte Shadang Ngwa Ley ni rai nna, shanhte hpe HPyen Dap kata e rim jep ngut ai hpang, Gumhpraw sen mi hte bai dat ya sai lam, Buga ginra masha ni shana wa ai kaw na chye lu ai.
