Sahmaw mare na masha dut sha hkrum ai wa hpe matut mahkai sagawn nlu

                                          Photo Credit; Labang La San

Mogaung Ginwang, Sahmaw mare na Salang Lahpai La Ja ( U Shwe Gu) hte Jan Labya Lu Tawng yan a kasha asak 23 ning re ai Jan Lahpai Ja Nu gaw Thai mungdan de bungli sa galaw na ngu sa mat ai kaw nna dut sha hkrum mat ai re lam nta masha ni shana wa ai kaw nna chye lu ai.

“Shi gaw ma langai lu sai kanu num re. Shi ningrum ningtau la wa hte nhkrum nra ai majaw gumhpraw tam na nga ti Thai de nga kun sa ai da ai raitim Thai de gaw ndu rai nna Ayeyarwady Division kaw wa nga taw ai hku rai nga. Dai kawn, kadai ni rau nga kun (nchye lu ai ) miwa mung de sa mat wa ai kaw nna dut sha hkrum mat ai re” nga nna Sahmaw mare na Rev. Brang Nu tsun ai.

Ja Nu gaw asak 3 ning re ai kasha langai lu ai rai nna shi a ningrum ningtau la wa hte nhkrum nra byin ai majaw gumhpraw sa tam na ngu nta kaw nna 2020 ning shata man masum hta pru mat wa ai re.

Kanu Yan Kawa hpe gaw masha ni Thai de bungli matut ya na re ngu nna tsun kau da nhtawm kasha hpe gaw manang ni a nta hta shata mi lap sen lahkawng jaw na ngu nna ap da ai re lam nta masha ni tsun dan ai.

Nta masha ni hte buga masha ni gaw 2020 ning July shata nhtoi 26 ya shani hta she Jan Ja Nu dut sha hkrum ai lam chye lu ai re. Raitim daini du hkra matut mahkai sagawn nlu shi ai re.

Ndai lam hte seng nna nta masha ni gaw “ Dumsu, nga rem nna nrau ai, shinggan de san sagawn hkawm sa ai lam nlu galaw ai majaw buga na Rev.Brang Nu hpe sha sagawn ya na matu garum hpyi da ai lam nga ai. Bai nna anhte kanu kawa ni kaw nna hkan na matu mung ja gumhpraw nlu ai re majaw kaning ndi nlu hkan ai ga rai nga ai, nga nna dut sha hkrum ai Jan Lahpai Ja Nu a kawa Salang Lahpai La Ja tsun ai.

Sahmaw mare kaw hpung htinggaw masha yawng 300 jan nga ai rai nna lai wa sai ten ni hta mung ya na zawn masha dut sha ai lam, law law lang byin lai wa ga sai re hpe mung chye lu ai.