Salang. Shwe Min (P.T.Ts) hpung ni hpyen laja lana lahkawn nga

Waimaw Ginwang hte Awng Mye (1) mare ni hta Salang. Shwe Min woi awn ai, (P.T.Ts) hpyen hpung ni hpyen laja lana lahkawn nga ai lam chye lu ai.

January shata 14 ya shani kaw na Awng Mye (1) mare lam kaba ntsa, Nlung Hka mahkrai kaw dap jung shara jahkrat nga ai, P.T.Ts hpung ni lai sa lai wa mungshawa ni hpe laja lana san jep nga ai hte hpyen rim lahkawn nga ai lam, ginra masha ni kaw na chye lu ai.

Lai sa lai wa mungshawa ni hpe hpa amyu rai nga san nna, Lisu hte Maru nga yang yawng rim lahkawn ai, mare kata hta mung ramma nnga ai nta htinggaw ni hta asak kaba sai ni hpe rim woi mat wa nna, asak ram ai ni hte bai wa galai shaw la shangun ai lam ni galaw nga ai nga nna, ginra masha ni matut tsun dan ai.

Lisu, Maru, Lashi hte Nawku hpung woi sara ni hpe mung rim lahkawn nga ai hte asak kaba sai ni hpe gaw Myen gumhpraw sen mali hte wa shaw la shangun nna, asak naw kaji ai ni hpe gaw asak ram ai nta masha langai ngai hte wa galai shaw la shangun ai lam chye lu ai.

Hpyen rim lahkawn nga ai majaw, dai ginra na asak naw ram ai ramma, wa ja ni hprawng koi yen hkawm nga ai hte lai sa lai wa mungshawa ni mung sadi maja hkawm sa ra nga ai lam chye lu ai.

Lai wa sai 2023 ning October shata 30 ya shani, Salang. Shwe Min hku nna, Lisu htinggaw langai mi hta P.T.Ts hpyenla marai langai galaw ra na nga nna, ndau laika shapraw da ai kaw na ndai zawn rim lahkawn nga ai re hpe chye lu ai.