Salawng Kawng mayan kaw gasat gala majan laja lana matut byin nga
Ginjaw Ginra, Manmaw sa lam ntsa na Myo Tit, Kunglaw mare ntsa Salawng Kawng mayan de Myen Hpyen Dap kawn April shata 24 ya shani kaw nna April 28 ya shani du hkra hpyen nbungli, sinat laknak kaba ni hte shani shagu ngu na htu shadut htim gasat nga ai majaw, KIA hte matut manoi gasat gala majan laja lana byin nga ai re lam, shawng lam shisawk ni kawn chye lu ai.
Ya na zawn hpyen nbungli hte wa gap gasat ai majaw Myo Tit, Kunglaw mare na mung shawa ni a dum nta law law hten za hkrum mat ai sha n-ga, hkala nba asak si sum ai masha ni mung law ai re hpe na chye lu ai.
KIA ni nga ai shara de Myen Hpyen Dap kaw nna hpyen nbungli, sinat lanak kaba ni hte nhkring nsa htim gasat htu shadut lung wa ai majaw, Myo Tit, Kunglaw hkan na mungshawa ni mung, ya aten Nmawk hte Manmaw mare kaba de hprawng koi yen shang wa ai re lam chye lu ai.
Myen Hpyen Dap ni dap jung shara jahkrat nga ai Alaw Bum Hpyen Dap hpe KIA hpyen hpung ni kaw nna March 25 ya jahpawt daw zing la kau ai hpang, Myen Hpyen Dap kaw nna ya aten dai shara hpe bai madu lu na matu htim gasat majan hpaw nga ai re hpe na chye lu ai.
