Sam hkyeng hte Min Zay Thant P.T.Ts ni mungshawa arung arai hpe mya lu mya sha nga

Hugawng ginra kata Sam hkyen P.T.Ts hte Min Zay Thant P.T.Ts pawng hpawm hpyen hpung ni mungshawa arung arai hpe mya lu mya sha ai lam galaw nga ai hpe chye lu ai.

Hugawng ginra kata rai nga ai Oi Law, Lapu Hka hte Pya Soi ginra na mungshawa ni gaw gasat gala majan a majaw, hpyen hprawng koi yen nga ai aten, Sam hkyen P.T.Ts hte Min Zay Thant P.T.Ts pawng hpawm hpyen hpung ni mungshawa arung arai hpe mya lu mya sha ai lam galaw nga ai nga nna, ginra masha ni kaw na chye lu ai.

P.T.Ts pawng hpawm hpyen hpung ni gaw, mungshawa ni a arung arai hpe shanhte ra ai hku mya lu mya sha htaw la nga ai rai nna, ja maw kata hkan nga ai ka-ni ya ni hpe mung gumhpraw jaw nna, arung arai htawk sa shangun ai lam ni galaw nga ai hpe chye lu ai.

Danai Lido lam Lawa mare kaw mung, Min Zay Thant P.T.Ts ni shagyit tawn nna, laiwa laisa mungshawa ni hpe laja lana sawk jep ai lam, asak ram ai num kasha ni hpe zai mazut ai lailen hte tsun shala shaga sawk jep ai lam ni galaw nga ai hpe chye lu ai.

Ndai zawn sawk jep ai lam ni galaw nga ai majaw, dai ginra na mungshawa ni hkrit tsang let sha hkawmsa hkawmwa nga ra ai lam chye lu ai.