Sama Ginwang, Ja Pu buga ni tinang mare buga de bai nhtang wa na matu tau hkyen shajin nga
Sama Ginwang, Ja Pu buga ni tinang mare buga de bai nhtang wa lu na matu, mying jahpan hta shinggyin ai lam, nawku jawng wang jasan jaseng ai lam hpe December shata praw kaw nna galaw hpang nga sai lam na chye lu ai.
Ya na zawn hpyen yen ni tinang mare buga de bai nhtang wa lu na matu, KHCC kaw nna woi awn ai kata kaw, nawku hpung kaw nna hkrang shapraw galaw sa wa ai re lam chye lu ai.
Sama Ginwang kata na Dabak mare gaw shawng nnan tinang mare buga de wa nga lu na matu hkyen shajin nga sai rai nna, hpang kalang bai wa na buga kaw Ga Ra Yang, Katsu Yang, Ja Pu hte Malang Yang mare ni bai wa lu na matu, tau hkyen lajang sa wa ai re lam, Sama Ginwang Muna Kyithkai Hpu-awn Rev. Labang Naw Lawn tsun ai.
“Shawng nnan Dabak mare ni wa na matu malawng shajin magang sai, Dabak mare ni hpe woi jasat jasa sa wa ai hpang, bai wa na buga kaw lu lawm wa yang hkrak ai, lanam bai shang wa yang grai bai yak wa na, hten run hten za wa ai lam ni grau law wa ai majaw ndai bungli hpe galaw sa wa ai lam re” nga nna tsun dan ai.
Muklum mare kaba de shanu shingbyi nga ai Ja Pu buga hpung masha ni a htinggaw jahpan 200 daram hpe hta shinggyin da lu sai rai nna, jarit mayan kaw shanu shingbyi nga ai Hpun Lum Yang, Je Yang, Woi Chyai, Pa Jau, Sha-it Yang hte Maga Yang kaw na Ja Pu buga hpung masha ni a htinggaw jahpan hpe mung, hta shinggyin na matu hkyen shajin nga ai raitim, hkrun lam mayak a majaw yak hkak dut dang nga ai lam chye lu ai.
December shata 24 ya shani hta gaw, Ja Pu buga hpung masha ni kaw nna shaning 10 ning daram tawn kau da ai tinang mare buga, nawku hpung wang kaw Christmas nawku dawjau lamang hpe hkamja lam hte htap htup hkra wa galaw na matu hkyen shajin da ai lam chye lu ai.
Sama Ginwang kata buga hpung 23 nga ai hta, hpyen koi yen nga ai buga hpung 18 daram nga ai kaw na, Dabak mare hte Nam San mare ni gaw shawng nnan tinang mare buga de wa nga lu hkra shakut shaja nga sai lam chye lu ai.
Photo Credit; Naw Lawn Shingni Pan
