Sama Ginwang Sasana Lahta Tsang Jawng Dingshawn Poi hte tsang 11-12 (Higher Secondary School) jawng hpaw poi lamang galaw
Sama Ginwang Sasana Lahta Tsang Jawng n-ta ningnan dingshawn poi hte tsang 11-12 (Higher Secondary School) jawng hpaw poi lamang hpe September shata praw 5 ya jahpawt hkying 9:00am aten hta Laiza lawk 1, Sama Ginwang Sasana Lahta Tsang jawng wang kaw galaw la lu sai re.
Lamang hta shawng nnan jawng dingshawn akyu hpyi lamang galaw ai rai nna, Rev. Dr. Hkalam Samson, Du Kaba Sumlut Gun Maw, Du Kaba Wana Yaw Htung, Salang Kaba Labang Doi Pyi Sa, Rev. Nbwi Htoi San hte Du Kaba Lahpai Hing Wawm ni kaw nna lai sumri rep shaman hkam hkaw ga tsun nna lai sumri rep ai hte jawng chyinghka zaw hpaw ai lamang hpe woi galaw ai re.
Hpawng lamang hta KIC Ningbaw Malai Du Kaba Sumlut Gun Maw kaw nna daini na lamang gaw anhte amyusha ni a matu arawng sadang lu ai lamang langai mi re ngu masat masa galaw ai lam, ya na zawn Sama Ginwang Sasana jawng kaw nna tsang 11-12 hpaw dat lu ai lam gaw mungkan a hpaji ni hpe hkri dun lu na matu chyinghka lam kaba hpaw la lu ai lam re nga nna shatsam mungga hta tsun ai.
“Tsang 12 ngu ai hpe hpaw dat ai shaloi mungkan a hpaji masa mungkan a hpaji hpe hkri dun na matu chyinghka lam kaba rai nga ai, dai majaw mungkan a hpaji hte mahkri shawn lu na matu, dai de pru hkawm sa wa lu na matu, mungkan a hpaji ni hpe anhte nlu sa ai shaloi anhte hpang maga de shang wa lu na matu chyinghka lam kaba hpaw la lu ai nhtoi lamang rai nga ai” nga nna tsun ai.
Mungdan Asuya hte Kanu kawa ni komiti ni kaw nna myit shjin da ra ai lam gaw, tsang 12 ngut ai hpang, madang tsaw ai College Dakkasu nkau mi de ndep ai jawngma ni a matu, kan bau hpaji jawng ni hpe matut nna hpaw ya ra na lam Du Kaba matut tsun ai.
Ndai tsang 11-12 program hta Asuya jawng tsang 10 awng sai ni hte Myen Mung Asuya jawng tsang 10 awng sai jawngma ni hpe mung hkap la nhtawm, English jep ya ai lam galaw ai hta, naw ningra ai jawngma ni hpe Pre- GED (General Education Development) Program hta shata 10 English hte Computer hpe sharin ya ai rai nna, tsang 12 awng sai jawngma ni hpe jawng awng lakmat jaw nhtawm, tinang lung mayu ai jawng hta lata la lu na matu hkyen lajang da ya ai lam, Sama Ginwang Sasana Lahta Tsang Jawng Up Sara Kaba Maji Naw Hkawng tsun ai.
Hpawng lamang hta KIC Ningbaw Malai Du Kaba Sumlut Gun Maw hte Ginjaw Komiti Salang ni, KBC Ningbaw Rev. Dr. Hkalam Samson, KTCS Jawng Up Rev. Dr. Zinghang Lat Nawng, WMR Salang ni, Sama Ginwang Hpung magam gun ni, Laiza Muklum kata na hpung woi ni hte laksan saw shaga da ai myitsu hpung kanu wa ni sa du shang lawm ai lam chye lu ai.
Sama Ginwang Sasana Lahta Tsang jawng hta ya aten jawng lung hpaji sharin hkam la nga ai jawngma ni yawng marai 332 rai nna, tsang 11-12 program jawngma ni marai 23 hte jawng Sara/num ni yawng marai 34 re lam chye lu ai.
Photo Credit; Pawm Hkun Awng, Mai Mai Seng Lahpai
