Sama Ginwang Sasana Lahta Tsang Jawng hpaw sharin nga sai
COVID-19 Ana Zinli a majaw, May shata 25 ya shani pat tawn da ai Sama Ginwang Sasana Lahta Tsang Jawng hpe June shata 16 ya shani kaw nna bai hpaw sharin nga sai lam chye lu ai.
Jawng hpe jahapwt hkying 7:00am aten kaw nna hkying 10:00pm aten du hkra kalang, hkying 11:00am aten kaw nna hkying 2:00pm aten du hkra kalang, numdaw 2 hku sharin ya nga ai re.
Jawng lung nhtoi laban bat 1ya hte 2ya hta lawu tsang jawng ni lung nna, 3ya hte 4ya hta lapran tsang jawng ni jawng lung ai hte 5ya hte 6ya hta gaw lahta tsang jawng ni hpe sharin ya ai lam galaw ai hta, tsang gawk 1 hta masha 20 hta njan ai sha garan nna sharin ya nga ai re.
Sama Ginwang Sasana Lahta Tsang Jawng hta jawngma yawng marai 300 jan sa du sharin hka la nga ai rai nna, ya aten jawng lung na jawngma ni hpe jawng mying naw hkap la nga ai lam chye lu ai.
Jawng hpe March shata praw 9 ya shani kaw nna hpaw sharin hpang nga ai hta, Wunpawng Mungdan Shanglawt Asuya kaw nna jawng ni pat ra na lam tsun wa ai majaw, jawng hpaw sharin taw ai bat 2 naw rai yang bai pat kau ai re.
“Kaga jawng ni jawng dat ten ang ai raitim, Sama Ginwang Sasana jawng gaw jawng hpaw ten ang ai re, jawngma kanu kawa ni mung grai bai tsun wa ai re majaw, COVID-19 Ana Zinli Makawp Ninghkap Komiti de laika bang, shanhte hku nna mung seng ang ai ni hpang de bai shalai ya nhtawm, ya shanhte hku nna jawm dawdan ya ai kata kaw Ningbaw Malai hte Ginjaw Hpaji Dap Lithkam, Amu Madu ni, Sara Kaba ni hpe anhte jawng gara hku hpaw na lam tang madun shaloi shanhte hku nna June shata 16 ya shani jawng hpaw na matu ahkang jaw ai re” nga nna Sama Ginwang Sasana Lahta Tsang Jawng, Jawng Up Sara Kaba Maji Naw Hkawng tsun ai.
Jawng pru shang chying hka lam 3 kaw lata kashin shara galaw da ya ai rai nna, jawng chying hka lam shang wa ai hte lata kashin shangun ai lam, hkum kahtet shadang shadawn ai lam, n-gup magap shakap shangun ai lam hte n-ta kaw na jawng de lam hkawm sa ai jawngma ni hpe mung Volunteer san da ya ai lam Sara Kaba matut tsun ai.
COVID-19 ana makawp maga lam hte seng nna mung jawng sharin Sara/num ni, Volunteer ni, Jawngma ni hte Kanu Kawa Komiti ni hpe laksan ningmu jahpaw ai lam galaw da ya ai rai nna, jawng gawk shang ai hte Sara/num ni galai shagu ding yang tsun shadum ai lam ni galaw ai re hpe chye lu ai.
