Sama Ginwang Sasana Lahta Tsang Jawngma ni a, hkrang pan hte ga shagawp madun poi lamang galaw
Sama Ginwang Sasana lahta tsang jawng, jawngma ni a hkrang pan hte ga shagawp madun poi lamang hpe February shata praw 7 ya jahpawt hkying 9:00am aten, Nawng E Hku jawng wang SAMS Gawknu kaw galaw la lu sai re.
Madun lamang hpe February shata praw 7 ya shani kaw nna, 9 ya shani du hkra gawknu kata madun da ai lam galaw na rai nna, shawa masha yawng sa yu n gun jaw mai ai lam hpe chye lu ai.
Madun poi a yaw shada lam hpe Saranum Lahtaw Ja Tawng tsun ai hta “Majan a majaw myit ningma kap nga ai anhte a ma ni a myit hpe tsi ya lu na matu, myit shalan la let shanhte a tsawm htap ai prat hpe gaw gap la lu na matu, ma ni a kraw hkrat shingni atsam grau grau rawt jat wa na matu, ya na zawn rai byin nga ai masa hta hkan na ma ni a hkam sha lam hpe shawa daw tsa yawng hkra, chye na hkamsha lawm lu na matu hte kanu kawa hte sara/num ni sha n-ga makau grup yin yawng hkra mung ma ni a shanglawm ai, tsawm htap ai ma ni a prat hpe pawm ya lu na matu yaw shada ai re” nga nna tsun ai.
Ndai hkrang pan hte ga shagawp hpe 2022 ning kaw nna, tsang 5 kawn tsang 10 lapran na jawngma ni soi, ka wa ai hta shawng nnan lang na madun poi lamang re hpe mung chye lu ai.
Nawng E Hku sasana lahta tsang jawng hta 2022-2023 hpaji ladaw laika hpaji sharin hkamla nga ai jawngma yawng marai 500 jan nga ai rai nna, sharin sara/num ni yawng marai 40 nga ai re lam chye lu ai.
