Sama lam numshem mayan hta gumshem Myen hpyen hte KIA pawng hpawm hpyen hpung ni shara 2 kaw gasat gala majan byin
Manmaw, Myitkyina lam, KIA Masat (1) Dap Nawng Daju ginra, Sama lam numshe mayan kaw, November shata 11 ya shani hta gumshem Myen hpyen ni hte KIA pawng hpawm hpyen hpung ni shara 2 kaw gasat gala majan byin ai lam chye lu ai.
Dai ni shani ka-ang hkying 12:10pm aten kaw na hkying 1:20pm aten laman hta Sama lam numshem hte Baknan Yang lapran kaw numdaw kalang, hkying 4:00pm aten kaw na hkying 4:50pm aten, Katsu hte Baknan Yang lapran kaw numdaw 2 lang gasat poi byin ai re lam, lit nga ai salang langai tsun ai.
Dai na de Katsu hte Baknan Yang mayan kaw gasat poi byin ai ten hta Myitkyina maga sa rawt wa ai Helicopter nbungli hte KIA pawng pawng hpawm hpyen hpung ni nga ai maga de sa gap gasat ai lam chye lu ai.
KIA Masat (8) Dap Ba, Masat (41) Dap Dung ginra, Sa Maw kaw dap jung nga ai gumshem Myen hpyen Hk.L.Y (105) dap hpe PDF hpyen hpung ni sa gap gasat dat ai hpang, gumshem Myen hpyen ni mare de sinat kaba hkrup mara gap bun ai majaw, mungshawa marai (3) asak si sum nna, marai (3) hkala hkrum ai lam, ginra shiga lawk kaw na chye lu ai.
Ya aten hta Mungmyit Sinli Ga, Jinghpaw Mung, Karen Ni Mung hte Sagaing ginra ni hta gumshem Myen hpyen ni hte rawt malan wu hpung ni shani shagu ngu na gasat gala majan byin nga ai hpe mung chye lu ai.
