Sama mare hte Hubang mare lapran kaw, gumshem Myen hpyen ni hte KIA ni gasat gala majan byin
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Sama mare hte Hubang mare lapran kaw January shata 13 ya shana maga hkying 1:15pm aten kawn hkying 3:00pm aten du hkra gasat poi byin ai lam chye lu ai.
Myen hpyen dap gaw, Dapnu (Tatma-77) ngu gaw maram lu ai, n gun 100 daram re. Anhte ni nga ai maga de shamu shamawt shang wa ai majaw gasat poi byin ai re. Nga nna shawng lam na lit nga ai salang langai tsun ai.
Myen ni htingnut ai lam nnga shi ai majaw gasat poi gaw matut byin wa mai ai lam, salang wa tsun ai.
January shata 12 ya hta mung, Mungbaw krung Loi Sa mare makau kaw Kokang MNDAA ni hte gumshem Myen hpyen ni gasat poi byin ai lam nga ai. Gasat poi byin ai majaw, Nawng Heng, Loi Sa hte Sama mare hkan na mungshawa ni gaw, Mungbaw Wing Seng nawku jawng wang hte Mungbaw Pa de na jinghku jing-yu ni a nta hkan gan hprawng yen nga ai lam na chye lu ai.
