Sammung Wunpawng Hkringmang ninggang gashun gawdin ginsup poi galaw

Sammung Wunpawng Htunghking Hpung Ginjaw Ramma Komiti kaw nna lit la woi awn let, Sammung Wunpawng Hkringmang ninggang gashun gawdin ginsup poi lamang hpe Kuthkai Muklum mungshawa gawdin pa kaw galaw nga ai lam chye lu ai.

Gawdin ginsup ai a yaw shada lam gaw, Sammung Mungmyit Sinli Ga kaw nga ai Wunpawng ramma ni shada myit hkrum gahkyin gumdin ai hpe lu la na matu, ramma hkum ngau shagu hkamja zet let ai byin tai lu na matu, Ka-ni nanghpam hpe koi gam lu ai ramma ni byin tai lu na matu, gawdin ginsup ai hta ningtawn ai ramma ni pru wa lu na matu re ai lam, ginsup komiti na shiga lithkam sara Shekoi Dau Ze tsun dan ai.

Ginsup ai lamang hpe October 8 ya shani kaw na ginsup hpang sai rai nna, October 29 ya shani gaw ginsup hpung dim dat na re lam, ginsup team 16 shang lawm ginsup ai lam, sara Shekoi Dau Ze matut tsun ai kaw na chye lu ai.