San Luka Chyum Hkawlik jawng hpaw sharin sa na
Myitkyina, E-din mare kaw hpaw ninghtan tawn da ai San Luka Chyum Hkawlik jawng a 2020-2021 ning hpaji ladaw hpe July shata 23 ya shani hpaw sharin sa wa na lam chye lu ai.
Mying jahpan bang sai jawngma marai 20 jan nga sai rai nna, jawng lung na jawngma ni a mying jahpan hpe July shata 23 ya shani du hkra ding yang naw hkap la nga ai lam chye lu ai.
Jawng lung na jawngma ni gaw Ginwang Up Jau hte tara hkaw sara ni a madi shadaw laika la sa ra na hte tsi jep lek mat lawm ra na re, asak 18 ning lahta na hpaji madang tsang 10 awng sai ni hte Dakkasu Janmau lu da sai ni rai nna, nawku hpung hpe myit lawm ai ni hpe hkapla sharin ya na re lam chye lu ai.
Jawng lung jarik laning mi 500,000 (Sen Manga) hte tinang lang ai arung arai a matu Sen mi jan bang ra na lam, jawng lung ladaw 2 ning rai nna, jawng hta madung sharin ai gaw, Ja Chyum Mungga, Nawku hpung a lam hte kaga chye ging chye mai ai sharin ginhpan ni mung lawm ai lam, Sara Peter Lagyawm Ying Ting tsun ai.
“Kaga sharin gin hpan gaw, Social Development, hkai rem, Computer, English hpe laksan class hku nna mung, shinggan class hku nna mung sharin ya ai re” nga nna tsun ai.
Jawng hpaw na lam hte seng nna nawku hpung hte asuya a lam woi awn ai kata kaw galaw sa wa na re hte San Luka Chyum Hkawlik gaw hpung magam gun Sara/num ni hpe shalat ai jawng re hpe chye lu ai.
