Sara kaba Doctor Ola Henson nga lai wa ai shara hpe asuya magam gun nta galaw shangun wa
Mungmyit Sinli Ga ( Kachin Sub-state ) Namhkam Muklum Nawng Sang Kawng mungshawa tsi rung makau na Sara Kaba Dr. Ola Henson nga lai wa ai lamu ga nta wang kaw Namhkam Muklum na Sarawun kaba Sai La Din hte Myo Mi Myo Pha masha kaba nkau jahkrup la nhtawm, asuya magam gun masha ni rawng na matu ngu ai ga baw hte nta galaw na matu hkyen nga ai lam na chye lu ai.
“Ya na zawn nta galaw wa ai majaw, Mungmau ginwang ni gaw Taunggyi asuya de, ndai shara gaw anhte a shara she re nanhte jaw ya ra ai ngu sa hpyi ai, Taunggyi Wungyi Chuk wa mung gawgap nga ai ni hpe jahkring kau na matu tsun ai raitim, jahkring ai lam nnga ai majaw, Naypyitaw de ndai shara hta gawgap ai lam hpa mung n-galaw lu na matu ninghkap laika bang ai hpang ya gaw jahkring da masai” nga nna Mungmau Ginwang Amu Madu Rev. Lahpai Zau Ra tsun ai.
Ndai amu hte seng nna dai ni January 29 ya shani hta rung shagu na masha kaba ni zuphpawng galaw ai hta ya gaw Naypyitaw kaw na shiga sha nlu ding sa gaw kadai mung nhkra lu na ngu tsun ai lam chye lu ai.
“Ndai lamu ga gaw lai wa sai 1911 ning hta Sara kaba Dr. Ola Henson Namhkam de nnan du ai shaloi, shanhte ni Sinli Zawbawa wa kaw hpyi hkat ai gara hku hpyi hkat ai chyawm n chye ai, Zawbawa wa a Pamik lu nna ndai kaw shara jahkrat nga ai re. Dai kaw nta kaba gap nga nna Jinghpaw hku Chyum Laika gale ai shara nta mung re. KBC hku nna mung hkamja dap Wungyi hpe ndai bungli ni hpe shaprai kau ya na matu tsun tawn ai” nga nna Rev. Lahpai Zau Ra tsun ai.
1922 ning hta gaw Doctor Seagrave’s bai du wa nna Sara kaba nga ai makau kaw tsi rung wa hpaw sai. Dai hpang Ne Win Asuya gaw mungshawa ni a lamu ga zing wa ai shaloi dai mung lawm mat ai lachyum rai nga ai, zing shalawm tim mung dai shara gaw kadai mung nhkra ai dai hku tawn da ai shara re lam chye lu ai.
Ndai shara hta 2019 ning, January shata praw kaw nna galaw hpang wa ai re. Mi shawng na Sarawun kaba wa gaw ndai project hpe ndai shara kaw galaw na matu nre kaga shara kaw galaw na matu she re, ya na Sarawun Sai La Din du ai hpang she ndai shara hpe hpya bang wa ai masa pru ai, nga nna buga masha ni tsun ai.
