Sati Chyaw Myen dap hpe KIA ni zing
KIA Masat (7) Dap Ba, Masat (46) Dap Dung ginra, Sati Chyaw gumshem Myen hpyen dap post hpe KIA ni zing madu la lu sai lam chye lu ai.
August shata 30 ya shani Lang Yang Zup hte Saw Law mare lapran, Sati Chyaw kaw dap jung nga ai gumshem Myen hpyen dap post hpe KIA pawng hpawm hpyen hpung ni padang dip la lu sai lam, lit nga ai salang ni kaw na chye lu ai.
Ndai shara gaw gumshem Myen hpyen dap, P.T.Ts hte BGF ni pawng hpawm shara jahkrat nga ai rai nna, KIA pawng hpawm hpyen hpung ni August shata 29 ya shani kawn, htim gasat wa ai hta August 30 ya shani padang dip la lu sai re lam chye lu ai.
Matut nna Manmaw kawn Nmawk ginra de hpyen n-gun htu nga ai, gumshem Myen hpyen dap hte KIA pawng hpawm hpyen hpung ni lai wa sai August shata 24 ya shani kaw nna, matut manoi gasat gala majan naw byin nga ai lam chye lu ai.
