Seng Tawng mare kaw gumshem Myen hpyen ni hte KIA ni gasat gala majan byin
KIA Masat (9) Dap Ba, Masat (6) Dap Dung ginra rai nga ai, Hpakant Seng Tawng mare makau kaw, October shata praw 3 ya shani hkying 12:30pm aten, gumshem Myen hpyen ni hte KIA ni gasat gala majan byin ai lam chye lu ai.
Seng Tawng Mare Bum Ra Lawk maga hku htu shadut lung wa ai, gumshem Myen hpyen dap Hk.L.Y (76) hte Masat (30) laksan Balik dap na pawng hpawm hpyen n-gun (30) daram hte KIA ni gasat gala majan byin ai lam lit nga ai salang ni kaw na chye lu ai.
Gasat poi byin ai hpang Masat (30) Laksan Myen Balik dap kaw nna, gap dat ai laknak kaba si Seng Tawng mare Maw Shan hte Lawk (1) lapran na Moe Kaung Kin Store nta kaw wa hkrat kapaw ai hta nta wan hkru mat ai lam nga ai sha n-ga, Seng Tawng Mare Bum Ra Lawk kaw du nga ai gumshem Myen hpyen ni kaw nna, sinat kaji hkrup mara gap shadam ai hta asak 9 ning re ai La kasha langai kaw hkra hkala ai lam chye lu ai.
Dai hpang Lawng Hkawng Woi Kawng kaw nga ai, Masat (4) laksan gumshem Myen Balik dap hpe KIA hpyen hpung ni sinat kaba sa gap bun ai lam chye lu ai.
