Sha-iT Yang IDPs dabang dingshawn akyu hpyi hpawng galaw

Sha-iT Yang dabang ningnan dingshawng akyu hpyi hpawng hpe, June praw, 6 ya jahpawt hkying 7:00am aten e, pan grang rep di ai lamang galaw nna, shani hkying 11:00am aten

hta gaw, dabang dingshawn akyu hpyi hpawng galaw ai lam chye lu ai.

Dabang ningnan akyu hpyi hpawng hta magam dap makan dap na myitsu salang ni, nawku hpung woi sara ni, NGOs, JST ni, htingbu mungdan na manam ni hte hpyen yen mungshawa ni yawng marai ( 600 ) daram shanglawm ai lam, dabang gawgap komiti ningbaw salang kaba Hkaraw Tu Dan tsun ai kawn chye lu ai.

Sha-iT Yang dabang hta naw gawgap la ra ai lam hpe, salang kaba matut tsun ai gaw, RCM nawku jawng, KBC nawku jawng, LBC nawku jawng, tsi rung, Ma shalet jawng, dabang up nga na Nta hte mungshawa ni a Nta nkau naw gawgap la ra ai lam tsun ai.

Sha-iT Yang IDPs dabang gaw, Zai Awng Mungga Zup hte Maga Yang hpyen yen dabang na mungshawa ni hpe numdaw lahkawng lang htawt sit shara jahkrat ya ai dabang ningnan re.

Ya aten dai dabang hta nga ai mungshawa Nta htinggaw ( 403 ) rai nna, masha jahpan yawng marai ( 1816 ) tup re lam chye lu ai.