Shadang Lasang Myu Awng sat hkrum ai amu hte seng nna Manmaw Balik Dap kaw amu hpaw da

Manmaw, ေပါက္ကုန္း Badu Za, Ebbyu Buga Hpung kaw shanu nga ai Hpungtau Lasang Naw Ja hte Jan. Zahkung Hkawn Ra yan a kasha shadang Lasang Myu Awng asak (20) ning sat hkrum ai amu hte seng nna teng man ai mahtai hpe chye lu na matu chyinghkai kanu kaw nna Manmaw Balik Dap kaw amu shawk shawn da ai lam chye lu ai.

Shadang Lasang Myu Awng a hkum tsawp moimang hpe August shata 14 ya shani makoi mayang kau ngut ai hpang, shi a chyinghkai kanu gaw Manmaw Balik Dap de amu sa hpaw da ai re lam buga masha langai tsun ai hta,

“Pyada Dap kaw amu sa hpaw da yang Pyada ni gaw gara hku byin ai mabyin hpe san jep la ai dai sha naw re, ya du hkra raitim hpa mung nnga shi ai re” nga nna tsun dan ai.

Dum nta masha ni kaw nna shadang Lasang Myu Awng hpe sat kau ai masha kadai hpe raitim, seng ang ai lit nga ai ni kaw nna lu sagawn hkra sagawn ya na hpe myit mada kamhpa nga ma ai re.

Ndai mabyin gaw August shata 12 ya shana hta Shadang Lasang Myu Awng hte rau shi manang ni marai 6 gaw wam hkawm nna dum nta de wa ai shaloi, Myen la marai 6 gaw lam kaw hkap jahkring nna, shadang Myu Awng a manang shadang Gum Ring Awng gaw dai Myen kasha ni hte ga shawng shai, ga law hkat ai hta, manang ni yawng jawm je nga ai ten, Balik ni sa wa nna sa hkan shachyut rim ai hta kaga manang ni hpe lu rim la rai nna, shadang Myu Awng a hpang kaw gaw Balik marai 3 hkan shachyut mat wa ai hpang, shadang Myu Awng gaw hka kaw lup si taw ai re lam chye lu ai.

Hka kaw lup si taw ai shadang Myu Awng a moimang hpe yu ai shaloi n-gup ni je malawng mat ai rai nna, la pai maga na mi mung male pru taw ai, kan hkan mung shan hpyi ni je malawng mat ai sha n-ga, hkra maga garep npu kaw mung galun hkang hkang ai re lam, buga masha langai tsun ai kaw na chye lu ai.

Hpungtau Lasang Naw Ja gaw nnga mat ai 6 ning daram na sai rai nna, ya aten dum nta masha yawng marai 6 nga ai hte shadang Myu Awng gaw laiwa sai ten hta hpa mabyin manghkang mung nnga ga ai re lam chye lu ai.

Shadang Lasang Myu Awng hpe ya du hkra gadai gara hku ganing rai galaw ai majaw, asak si hkrum mat ai re ngu ai hpe garai n sagawn lu shi ai re hpe matut chye lu ai.

Photo Credit; Fb