Shadang Mung Doi Awng hpe sat kau ai bawng masha ni hpe tam sagawn nga

Hpakant-Gwi Hka, lung seng n hkun hka lawng kata kaw, Shadang Mung Doi Awng hpe sat kau ai bawng masha ni hpe seng ang ai salang ni kaw nna matut sagawn nga ding yang re lam chye lu ai

Asak si sum ai wa gaw Danai-Mung Ding lawk kaw shanu nga ai kawa Nba Tu a kasha Asak 28 ning re ai shadang Nba Mung Doi Awng rai nna Hpakant-Gwi Hka kaw lung seng htu let shanu nga ai re.

“Shi a mabyin lawng lam hpe gaw ya du hkra kadai mung atsawm nchye lu shi ai. Balik dap ni hte seng ang ai salang ni gaw, shi hkrai sat si ai lam gaw nre, masha law law hte jawm adup sat da ai rai na re ngu maram da ai lam nga ai” nga nna salang langai tsun dan ai.

Ndai lam hte seng nna shi a lau ban dum nta masha ni kaw nna akyu hpyi ya ai lam, seng ang ai salang ni hte balik dap ni, wuhpung wuhpawng law law ni kaw nna tara tawt lai ai bawng masha ni hpe jawm tam sagawn nga ding yang re.

“Ndai zawn byin ai mabyin gaw masha langai a asak nga pra na shinggyim ahkaw ahkang hpe tsawmra mi gumsheng mazut ai hte roi na sat ai lam rai nga ai. Hpakant kaw jahkring hkring ndai zawn byin wa ai lam hpe anhte mahtai lama ma gaw tam nna hparan ra sai bungli re. Seng ang ai magam dap kaw nna mung ndai hpe ja ja ahkyak la dan ra ai. Nrai yang gaw anhte jinghpaw ni power nnga wa ai hpe gau ngwi ngwi mu mada wa ai zawn, manang ni grau roi wa na hpe anhte nra sharawng ai hku re”  nga nna ginra masha Salang Jangmaw Nawng lat tsun da ai.

Shadang Mung Doi Awng a moimang hpe gaw December shata 11 ya shani hta seng ang ai balik dap ni kaw nna la mat wa sai re hte shi a mabyin lawng lam hpe mung tup hkrak nchye lu shi ai re.