Shadang Pawlu hpe pukma 228 hte htawng dam shata 3 bai kahtap jahkrat
Myitkyina Myo ne tara agyi U Than Htun hpe sumri di taw ai joi Jang jaw ai majaw pukma 228 hte tara jawat da hkrum ai Shadang Pawlu hpe September shata praw 6 ya shani hkying 10:00am aten hta hkyuk htawng kawn tara rung de shapraw jep joi nna htawng dam shata 3 bai kahtap jahkrat ai lam chye lu ai.
Hpyen yen mungshawa ni a hkam sha lam hpe lam ntsa hkrang shala street performance woi galaw ai majaw Nyein Suzi pukma 19 hte tara jawat hkrum nna September praw 2 ya shani htawng dam nhtoi 15 ya jahkrat hkrum ai ten hta shadang Pawlu gaw, Myo ne tara agyi U Tan Htun hpe sumri di taw ai joi jang jaw ai majaw myo ne tara agyi wa gaw tara rung hpe n gawn nsawn galaw ai, tara rung dung ten dingbai dingla jaw ai ngu ai hku nna pukma 228 hte ahkyak la ya na matu September praw 3 ya shani hta tara rung de shawk shawn da ai re, dai ni September praw 6 ya shani Shadang Pawlu hpe hkyuk htawng kawn tara rung de shapraw, jep joi nna Myitkyina myo ne ningtau tara agyi Daw Tin Noi Win kawn htawng dam shata 3 bai kahtap jahkrat dat ai re lam chye lu ai.
Hpyen yen mungshawa ni a hkam sha lam hpe shawa n-gun madun lamang woi galaw ai Nhkum La Nu hte Shayi Malang Hka Mai yan hpe mung ahkang lu da ai hta lai nna laika pa shajan hpai ai majaw September praw 5 ya shani hta Nyein suzi pukma 20 hte tara jawat da ai lam chye lu ai.
Tara jawat ai hte seng nna shawa n-gun madun ai kaw woi awn ai Ramma Ningbaw shadang Nhkum La Nu ya na zawn tsun ai. “ Laika Pa shajan hpai ai majaw re, shanhte kaw Nyein Suzi wa mara ai shaloi anhte mara ai kaw laika nkau mi nlawm ai, dai gaw anhte IDPs ni kaw na hkam sha ai tinang na tinang ka sa wa ai hte n-gun wa madun ai re, dai majaw shanhte hpe n madun dan da ai laga laika shajan ni la wa ai majaw re” nga nna tsun dan ai.
Dai ni 2 lang ngu na shawa n-gun madun ai hpe Myitkyina Muklum MPT rung shawng kaw jahpawt hkying 7:00am aten kaw nna shana daw hkying 2:30pm aten du hkra masha n-gun yawng marai 400 jan daram hte n-gun madun ai lam chye lu ai.
