Shadang Pawlu hte Shayi Seng Nu Pan yan hpe tara jawat ai Myen Balik Du hpe jep joi
Hpyen majan bai byin ai 8 ning hkring, hpyen yen ni a hkamsha lam hpe lam ntsa hkrang shala ( Street Performane ) lamang hpe woi awn galaw ai Shadang Pawlu hte Shayi Seng Nu Pan yan hpe Nyein Suzi pukma 19 hte tara jawat da ai Myen Balik Du Min Thant Zaw hpe July shata praw 4 ya shani hkying 10:00am aten hta Myitkyina tara rung kaw jep joi ai lam chye lu ai.
Shadang Pawlu hte Shayi Seng Nu Pan yan maga na Tara Kasa Mahka hku nna, tara ra Balik Du hpe masat nhtoi lamang galaw ai hkan tara jawat ai shiga na ga ai kun ngu san yang, Balik Du wa tsun ai hta Rakhine Mungdaw Pyithu Hluttaw shawng kaw Rakhine amyusha langai gaw Rakhine Mungdaw ahkaw ahkang hkrat sum ai shaning 200 ning jan nga nna dinghkrai n gun madun ai wa hpe tara jawat ai lam tsun ai.
Tara Kasa Mahka bai tsun ai hta Rakhine amyusha shi tsun ai gaw asuya hpe Rakhine Mungdan gawde na ahkaw ahkang jaw na matu tsun ai. June 9 ya shani Street performance hkrang shala galaw ai gaw asuya hpe gumlang ai n re. Hpyen yen aten ladaw 8 ning hta hkamsha ai lam hpe madun ai she re. Rakhine amyusha wa a mabyin hte nmai shabung ai ngu tsun tim, Balik Du wa gaw bung ai shawa n gun madun ai sha re nga ningdang tsun ai lam chye lu ai.
“Tara n jawat ging ai hpe masing nga nga hte galaw ai hpe mu lu ai, anhte gaw mara nlu ai re majaw ndai hpe ninghkap sa wa na matu shajin da ai” nga nna Shayi Seng Nu Pan tsun ai.
July shata 11 ya shani hta gaw tara hkam masha Shadang Pawlu hte Shayi Seng Nu Pan yan hpe bai jep joi na re lam chye lu ai.
