Shadang Pawlu hte shayi Seng Nu Pan yan hpe tara jawat da ai Myen Balik Du hpe tara jep

Nyein suzi pukma 19 hte Shadang Pawlu hte Shayi Seng Nu Pan yan hpe tara jawat da ai Myen Balik Du Myin Than Zaw hpe Myitkyina tara rung kaw June shata 19 ya shani hkying 10:20am aten kaw nna shani ka-ang hkying 12:30pm aten laman jep joi ai lam chye lu ai.

“Anhte gaw mara nnga ai ngu tsun da sai hte maren, mara nnga ai lam hpe jaja ninghkap sa mat wa na re. Ndai zawn rai kaja ai amu magam bungli, simsa lam hpe madi shadaw ai magam bungli galaw ai hpe shanhte ni hku nna anhte hpe tara jeyang ai ngu gaw anhte Myen Mungdan a uphkang taw nga ai Salang ni gaw, gara hku rai taw nga ai kade a npu kaw gara hku hkrit nna bungli galaw taw nga ai hpe anhte ni jaja htawng madun dan mayu ai, bai nna shanhte ni hpe ga san san wa ra ai lam ni nga wa ai” nga nna shadang Pawlu tsun ai.

Dai ni gaw amu shawk shawn ai wa hpe shawng ningnan lang tara rung kaw jep hpang ai, anhte maga na tara kasa ni hku nna, shi hpe ga san san ai lam ni nga ai, shi hku na hkapla ai lam ni nga ai raitim mung nkau mi gaw teng ai lam hpe ga san san wa ai shaloi nchye ai nga tsun ai lam ni nga ai, nga nna shadang Pawlu matut tsun ai.

Ndai amu hte seng nna rung 4 lang naw dung na rai nna, ndai June shata 26 ya shani hte du wa na July shata praw 4, 11, 18 ya shani rung bai dung na re lam chye lu ai.

Shadang Pawlu hte shayi Seng Nu Pan yan woi awn nhtawm, lai wa sai June 9 ya shani hta hpyen yen tsin yam hkrum ai ramma ni a hkamsha lam hpe lam ntsa shingni hpaji hkrang shala Street Performance madun ai majaw, Myen Balik Du Min Than Zaw kaw nna nyein suzi pukma 19 hte tara jawat da ai re.