Shadang Pawlu hte Shayi Seng Nu Pan yan hpe tara rung kawn htawng dam nhtoi 15 ya jahkrat

Hpyen yen tsin yam hkrum ai 8 ning hpring, hpyen yen mungshawa ni a hkam sha lam hpe lam ntsa hkrang shala ( Street Performance  ) lamang hpe woi awn galaw ai Shadang Pawlu hte Shayi Seng Nu Pan yan hpe Myitkyina tara rung kaw September shata praw 2 ya shani hkying 10:00am aten hta tara je yang daw dan nna htawng dam nhtoi 15 ya jahkrat ai lam chye lu ai.

Daini na amu hte seng nna Pawlu hte Seng Nu Pan yan maga na tara kasa Ma Hka ya na zawn tsun dan ai. “ Dai ni gaw Pawlu hte Seng Nu Pan yan hpe mara nga ai ngu nna gumhpraw dam mun 3 shing nrai htawng dam 15 ya tara rung kawn tara jeyang daw dan ai re. Ya Seng Nu Pan hte Pawlu yan gaw mara nnga ai re majaw gumhpraw dam nhkap la lu ai ngu nna ninghkap ai re majaw Myitkyina hkuk htawng de sa dat sai re” nga nna tsun ai.

Tara kasa Ma Hka hku nna mung shi a ning mu hpe ya na zawn tsun ai. Anhte hku nna gaw, ndai lam hpe n tara ai, tara rap ra lam nnga ai sha daw dan ai lam re, Balik ni hku nna mung tara n jawat gring ai kaw jawat ai, tara rung kaw nna mung htawng n jahkrat gring ai hpe jahkrat ai re majaw,  ya na ndai nyein suzi upadi hpe galai kau ra sai, dawm kau ra sai ngu mu mada lu ai. Tara agyi daw dan ai lam hta mung grau nna shanhte gaw shing ni hkrang shala ai hpe sha ahkyak la mat ai re majaw n tara ai,tara rap ra lam nnga ai. Shanhte hku nna majan byin ai masat nhtoi galaw ai ngu ai hpe masat masa n galaw ya ai re hpe mu lu ai re nga nna tsun ai.

Laiwa sai June shata 9 ya shani hta shadang Pawlu hte shayi Seng Nu Pan yan woi awn let hpyen yen mungshawa ni hkam sha ai hpe lam ntsa shingni hpaji hkrang shala Street Performance lamang hpe woi galaw ai majaw, Myen Balik Du Min Thant Zaw kaw nna Nyein Suzi pukma 19 hte tara jawat da ai rai nna, ya dai ni September 2 ya shani gaw jahtum hku nna tara rung kawn tara je yang daw dan nna htawng dam nhtoi 15 ya jahkrat ai re lam chye lu ai.