Shanglawt Asuya tsang shi jawng san poi htai hpang nga

Wunpawng Mungdan Shanglawt Asuya kawn hpaw tawn ai lahta tsang jawng tsang shi san poi hpe March praw 9 ya shani kaw nna, htai hpang nga sai lam chye lu ai.

Shawng nnan htai hpang ai ginhpan gaw, Jinghpaw laika rai nna, March shata 10 ya shani hta Myen laika, 11 ya shani Physics hte History, 12 ya shani English, 13 ya shani Chemistry hte Geography, 14 ya shani Biology hte Economics, 16 ya shani Mathematics ni hpe htai sa wa na re.

San Poi htai ai shara ni gaw, N-gum La lahta tsang jawng, Laiza lahta tsang jawng, Alen Bum hpyen yen lahta tsang jawng, Mai Ja Yang Lahta tsang jawng, Mung Myit Sinli lahta tsang jawng hte Nba Pa lahta tsang jawng ni rai nna, san poi htai ai jawngma yawng marai 552 re lam chye lu ai.

Myen Asuya tsang shi san poi hpe gaw, March shata 11 ya shani kaw nna March shata 20 ya shani du hkra htai sa wa na re lam, Myen Mung Dakasu jawng shang san poi san jep hpung ni ndau da ai kaw na chye lu ai.