Shaning ningnan hte chyeju shakawn wunli hkamla akyu hpyi hpawng galaw na

Wunpawng Shingni Hpung Ginjaw kawn woi awn nna, shaning ningnan hte chyeju shakawn wunli hkamla akyu hpyi hpawng hpe Myitkyina Shatapru manau wang, Shingni Hpung Ginjaw Rung shawng kaw January shata praw 6 ya shani galaw na re lam chye lu ai.

Akyu hpyi hpawng galaw ai a yaw shada lam hpe Wunpawng Shingni Hpung Ginjaw a ningtau amu madu yu ngwi ninghkring Maran Seng Naw ya na zawn tsun ai.

“Shaning nnan ma, du sai hte maren anhte a hpu shawng hpuba chyeju madu ni hpe hkungga jaw ai lamang hte laning mi hta kalang galaw ai wunli la kyu hpyi hpawng hta Wunpawng Shingni Hpung Ginjaw kaw na ni, nga manga myit rum ni yawng hkrum zup let chyeju rau jawm shakawn mayu ai hpe madung dat yaw shada ai re” nga nna tsun ai.

Shaning ningnan hte chyeju shakawn wunli hkamla akyu hpyi hpawng hta saw shaga laika hpe lak san hku nna n lu garan sai raitim, Shingni myit rum ni yawng sa du shang lawm na hpe saw lajin dat ai lam, yu ngwi ninghkring Maran Seng Naw matut tsun ai.

Ya na zawn shaning ningnan chyeju shakawn wunli la akyu hpyi hpawng hpe Wunpawng Shingni Hpung Ginjaw ni hku nna shaning shagu galaw ai re hpe chye lu ai.