Share Shagan Masat Ninghtoi akyu hpyi hpawng galaw

Wunpawng Mungdan Shanglawt Hpung Ginjaw Komiti tingnyang up Du Daju Jum Nban La a 2018 ning share shagan masat ninghtoi shatsam mungga hkamla akyu hpyi hpawng hpe, Laiza Muklum Sinpraw Majoi Manau wang gawknu hta August praw 10 ya jahpawt hkying 9:00am aten hta galaw ai lam chye lu ai.

Zuphpawng hta nawku hpung woi sara ni kaw nna, Karai Kasang kaw akyu hpyi ya ai hta, Wunpawng myusha ni shuthpyit ai mara hpe hpyi nem tawngban ya ai lam, Amyu hte Mungdan a matu asak ap nawng mat wa sai myutsaw mungtsaw share shagan ni a matu, share shagan ni ngam kau da ai kunding hku nta masha ngwipyaw hkam kaja bawng ring wa na matu, Ginjaw Komiti Tingnyang Up hte Ginjaw Salang ni yawng ngwipyaw hkam kaja na matu, Wunpawng Amyu sha ni a shawnglam Mungmasa ninggam tsaw, rawt jat wa na matu hte Amyu sha lawt lu lam hta Wunpawng amyu sha ni grau nna myit hkrum kahkyin gumdin let shanglawm shakut shaja wa lu na matu akyu hpyi ya ai.

Wunpawng Mungdan Shanglawt Hpung Ginjaw Komiti Tingnyang Up Du Daju Jum Nban La a 2018 ning share shagan masat ninghtoi shatsam mungga hpe Laiza Muklum uphkang Du Salang Kaba Sabaw La Zau hti shalai ya ai. Zuphpawng hta Mungchying shawa hte Magam Dap, Makan Dap na magam gun ni yawng marai 1400 jan sa du shanglawm ai lam chye lu ai.

Share shagan ninghtoi masat ai lam hpe lai wa sai, 1975 ning August shata 10 ya shani Ningbaw Kaba Lahtaw Zau Seng gaw Mungdan magam bungli gunhpai nga ai ten, Thai Mungdan Htam Ngawp Kahtawng hta Tai hpyen gumlau ni a lata hta asak ap nawng mat wa sai. Dai shani hpe la nna share shagan masat ninghtoi hpe galaw sa wa ai re.

Ndai share shagan masat ninghtoi hpawng lamang hpe Mungdan kata hte Mungdan shinggan, Wunpawng myusha ni nga ai shara shagu kaw galaw nga ai lam chye lu ai.