Sharin Shakyang Dap Dung ni kaw nna shawa lam makau hku maza mala hta san seng san pan lam galaw
Hpyen Sharin Shakyang Dap Dung ni kaw nna Laiza mahkrai pawt lam ntsa kaw nna Je Yang sa lam Nau Ra Golf Pa lam du hkra November shata 9 ya jahpawt hkying 7:00am aten hta maza hta san seng san pan lam galaw ai re.
Maza mala hta san seng san pan lam woi galaw ai lam hte seng nna Sharin Shakyang Dap Dung kaw Dap Reng magam lit gun hpai nga ai Du Jum Tangbau Ze Dau tsun ai hta,
“Modo lam ntsa kaw yawng hta lit nga ai gaw rai nga, raitim myit nsu ai nkau ni maza mala ni, lam ntsa kaw kabai ayai da ai hpe mu lu ai majaw, dap dung shawng mung rai nga ai Laiza mahkrai hte Je Yang sa lam Golf Pa du hkra, n yat mat ai baw maza mala amyu myu, arung arai hkrai rai taw nga ai majaw, nhta kau yang galoi mung a yai taw na re hpe mu mada ai majaw san seng san pan lam hpe yaw shada let woi hta ai re” nga nna tsun ai.
Mung mare masha ni mung tinang hte seng ang ai nta ndaw shawng Modo lam shawng hkan tinang nlang mat sai maza mala arung arai ni hpe majoi n kabai ayai da ai sha la mat wa nna masat da ai shara kaw nat san seng kau ai lam galaw yang grau nna kaja na re ngu mu mada ai majaw, yawng a lit re yawng jawm galaw yang she san seng wa na re nga nna Dap Reng matut tsun ai kaw na chye lu ai.
Lai wa sai shaning hta gaw san seng san pan lam maza hta ai lam ni hpe ramma ni woi awn galaw ai rai nna, daining gaw sharin shakyang dap dung kaw nna shawng nnan lang woi awn galaw ai re lam chye lu ai.
Serve to nature volunteers ramma ni kaw nna mung, October shata 17 ya jahpawt kaw nna laban jahpawt shagu Laiza Muklum kata grau nna san seng tsawm htap wa lu na matu, mung shawa ni dung pyaw chyai ai Munglai Hka makau hkan na maza ni hpe hta nat ai lam galaw nga ai re.
