Sharing of IDP’s life and their expectation zuphpawng galaw

Relief Action Network for IDPs Refugee ( RANIR ) Hpyen Yen Lakawn Lanawn Jinghkri Hpung ni woi awn nna, December praw 5 ya jahpawt hkying 9:00am aten kaw na shani ka-ang hkying 12:30pm aten du hkra, Sharing of IDPs life and their expectation zuphpawng hpe Laiza Muklum Laiza Hotel kaw galaw ai lam chye lu ai.

Sara Lama La Rip ( RANIR Board Member ) kaw na hpawng hpaw mungga shaga ya ai. Sara Sumlut La Tawng ( Project Manager ) gaw, project a lam sanglang dan ai. Dai hpang hpyen yen dabang Masat shadaw ( 6 ) Sha-it Yang, Woi Chyai, Je Yang, Hpun Lum Yang, Pa Kahtawng kaw na du sa ai kanu kawa ni shanhte hta byin nga ai mayak lam ni hpe tsun dan ai lam galaw ai.

Ndai zuphpawng galaw ai a yaw shada lam hpe, sara Sumlut La Tawng tsun ai gaw, ( 1 ) Life Story Telling wunkat hta shanglawm lai wa sai hpyen yen masha ni kawn shawa hpawng, shawa man hta Ga tsun shaga ai lam, atsam ningja grau rawt jat wa lu na matu, ( 2 ) Kachin Peace Process a ntsa hpyen yen ni a chye na hkamla da ai lam, mu mada ai lam, hpyen yen ni a nsen hpe shatsaw sharawt ya lu na matu, ( 3 ) Hpyen yen masha ni a hpyen yen prat aten ladaw hta hkamla nga ai shinggyim nauna karum ningtum masa lam hta la kap nna, seng ang ai wuhpung wuhpawng ni hpang de htawng madun tang madun lu na matu, ( 4 ) Hpyen yen ni a myit shingran, shanhte ni kawn byin shangun mayu ai lawnglam ni hpe multimedia hku nna, wanglu wanglang htawng madun ya lu na matu re, nga nna tsun ai.

Zuphpawng hta hpyen yen ni hpe garum ningtum jaw nga ai wuhpung wuhpawng na myitsu kanu kawa ni hte Magam dap, Makan dap, na myit su ni yawng marai ( 32 ) sa du shanglawm ai.

Hpyen yen lakawn lanawn jinghkri ( RANIR ) hpe, laiwa sai 2011 ning July shata hta hpaw dat ai re hpe chye lu ai.