Myitkyina Muklum Manhkring, buga wan rung shawng kaw, February shata 14 ya shana hkying 11:30pm aten daram hta shawa n gun madun ai mungshawa ni hpe balik ni sinat hte gap ai majaw, mungshawa langai hkala hkrum ai lam chye lu ai.
“Tinang ra ai lam tsun let, hpri pung dum shawa n gun madun taw yang sinat ngoi wa nna, hprawng ai ni gaw hprawng, dung ai ni gaw dung rai dung nga yang, ngai na pai maga lagaw labawp kaw hkra ai” nga nna hkala hkrum ai Salang Nangzing Brang Mai tsun ai.
Raba sinat pala hte gap hkra ai re. Shanhte gaw wan jak rung kaw shim lam la ai nga nna, majan pa kaw du taw ai zawn, hpyen modo ni hte shara la ai lam galaw ai, dai zawn gaw n galaw ra ai. Wan sat na nga shiga mung bai na ai majaw wan nsat na matu, shawa n gun 200 daram hte n gun madun ai re lam, salang wa matut tsun ai.
Sinat gap hkrum ai salang wa gaw ya ten hta hpyen dap tsi rung kaw tsi tsi hkam la nga ai rai nna, shawa n gun madun ai kaw shi sawk marai 5 hte n gun madun ai kaw lawm ai mungshawa marai 2 hpe rim woi da ai raitim, dai ni bai dat ya sai lam buga masha ni shana wa ai.
February shata praw 1 ya shani hta Myen hpyen dap gaw, mungshawa asuya daru magam ahkang aya zing madu la ai hpyen gumshem lai hpe nra sharawng ai majaw, mungshawa law law hte asuya magam gun ni shawa n gun madun nga ding yang re hpe chye lu ai.
