SHG jarit mayan rung nta dingshawn akyu hpyi hpawng galaw
Sama Ginwang Hkalup Hpung Ginjaw (SHG), Jarit mayan rung lakying dum nta ningnan dingshawn chyeju shakawn akyu hpyi hpawng hpe August shata 26 ya shani hkying 10:00am aten hta Laiza, Nawng E Hku Buga, Sama Ginwang Sasana wang hta galaw ai re.
SHG jarit mayan rung nta hpe lai wa sai 2020 ning April shata kaw nna galaw hpang wa ai lam chye lu ai.
Rung nta galaw ai a yaw shada lam hpe SHG Ningbaw Rev. Nbwi Htoi San tsun ai hta “Ndai shara hpe gaw moi kaw na Nawng E Hku buga hpung sasana jawng nnan galaw wa ai ten, ndai shara kaw e sinpraw hkran sasana magam bungli a matu, rung langai mi gaw gap na matu mi kaw na yaw shatawng shada ai lam nga ai, dai hta hkrang grai nlu shapraw nga ai ten, nmyit mada ai hpyen bai yen mat wa ai, jarit mayan de nga ai hpung masha ni hpe matut mahkai gahkyin gumdin lu na matu, anhte a buga masha ni law malawng ngu na daram, ndai de nga ai dai ni hpe woi zinlum na matu mung ahkyak ai re majaw, lawan dik ai hku hkrang shapraw rai, Karai Kasang ahkaw ahkang jaw ai hte galaw la lu ai lam rai sai” nga nna tsun ai.
Sama Ginwang kata hta buga hpung 24 nga ai, hpung masha jahpan yawng marai 30,000 hkawt nga let, SHG a rung daju gaw Katsu kaw rai nna, Myitkyina hte Laiza kaw rung lakying hpaw da ai re lam, Sara Kaba matut tsun ai.
Akyu hpyi hpawng hta KBC Ginjaw Amu Madu, Manmaw Ginwang Amu Madu, Waimaw Ginwang Amu Madu, Laiza Buga Hpung a Hpung Up, Nawng E Hku Buga Hpung Up hte nawku hpung masha ni sa du shang lawm ai re hpe chye lu ai.
