Shingnan hpung shang salang hkalum shatsam hte hpung shang salang majing ni a ga shaka jaw hpawng galaw
Wunpawng Mungdan Shanglawt Hpung, shingnan hpung shang masha ni hpe hkalum shatsam hte hpung shang salang majing ni a ga shaka (Oath) hkamla hpawng hpe October shata 10 ya jahpawt hkying 10:00am aten hta Padang Hkrunlam Majan Masing Woi Awn Rung Zuphpawng Gawknu kaw galaw la lu sai.
Hpawng hta KIO hpung shang salang majing ni hpe ga shaka (Oath) jaw ai lamang hte ga shaka hkamla sai hpung shang salang majing ni hpe (PF) masat buk hte masat masa shagrau jaw ai re.
Ginjaw Rung Pati Komiti Tingnyang Up Salang Share Zau Awng kaw nna hpung shang salang majing ni hpe ga shaka hkam mungga shaga ai hta,
“Anhte gaw Mungdan hte Mungdan sha ni a man e ga shaka hkam la da sai re majaw, ga sadi hpe hkan nang hkan sa ga, amyu sha gawng malai tai let woi awn nga ai Wunpawng Mungdan Shanglawt Hpung hpe kam hpa nga let myu sha rawt jat lam hta apnawng shakut shaja ga” nga nna tsun ai.
Shingnan hpung shang salang nnan ni hpe Ninggawn Daju Komiti Shingtau Tingnyang Up (II) Salang Lahpai Hing Wawm kaw nna, KIO hpung Pati hte seng ai lam hpaji jaw mungga shaga ai hte hkalum shatsam mungga shaga ai hta,
“KIO gaw mungshawa a akyu ara hpe gun hpai ai, wunpawng mundan hte wunpawng amyusha ni hpe myit hkrum gahkyin gumdin ai, mungshawa yawng a lam woi ningshawng tai ai, mungshawa a gawng malai tai ai, rawt malan ai hpung pati re. Dai majaw KIO hpung shang masha ni yawng shada myit hkrum ai hte hpung pati grau nna greng grak wa hkra hpung pati a lam hpe ding yang hkaja ai hte amyu sha magam bungli hta apnawng gun hpai ga” nga nna tsun ai.
Hpawng hta ga shaka hkamla ai hpung shang salang majing ni gaw KIC Rung, KIOCC Rung, Ninggawn Daju Komiti Rung, Ginjaw Amyu Shayi Komiti Rung kaw na magam gun ni marai 16 rai nna, shingnan hpung shang masha ni gaw KIOCC Rung, Zai Ninggawn Rung Pati Lakung, Ginjaw Amyu shayi Komiti Rung, Ginjaw Ka-ni Nanghpam Pat Jasan Rung magam gun ni marai 58 re hpe chye lu ai.
