Shingni Nbat kawn woi awn nhtawm Ramma Chyum Laika sharin hpawng galaw na hkyen nga

Waimaw, Mungna mare hta Shingni Nbat kawn woi awn let Ramma Chyum Laika sharin hpawng hpe June shata 18 ya shani kaw nna July shata praw 6 ya shani du hkra bat masum tup sharin na re lam na chye ai.

Chyum laika sharin hpawng a ga baw gaw “Ramma ni a prat hpe mungga hte gaw gap sa wa ga” ngu ai ga baw a kata kaw sharin mat wa na rai nhtawm, kaga lata hpaji ni rai nga ai, shadu kachyawng ai lam, muk galaw ai lam ni hte Nampan mawn sumli ai ni hpe mung sharin ya na re. Sharin Sara ni gaw Sara Maran La Doi hte KBBC ( Madung Hpung ) kaw na Sara ni sharin ya na re.

Chyum laika sharin hpawng galaw ai a yaw shada lam hpe Shingni Nbat Ningbaw Saranum Lahpai Nang Pri kaw nna ya na zawn tsun dan ai.

“Daini anhte wunpawng ramma ni, mungga hte nrai yang tsadan hkyen lajang da ai hkrat sum hpa law law nga ai. Nang hpam malu masha hte kaga hkrat sum hpa law law nga ai re majaw hpyen yen ramma ni hpe mungga hte gaw sharawt ai lam re. Ya ten gaw shanhte a matu myit daw ai, myit htum ai, myit ru ai, myit tsang ai, myit masin daw grawp ai ten re majaw shanhte hpe mungga hte gaw de ya na, shahte a prat hta dang di ai daram garum lu na matu yaw shada ga ai”

Ndai Chyum laika sharin hpawng gaw shawng ningnan lang rai nna, hpyen yen ramma ni a matu madung yaw shada let sharin ya na re lam, Saranum tsun ai.

Ya aten hta sharin hpawng hta du nga ai ramma ni gaw, Sha-it Yang hpyen yen dabang, Masat Shadaw 8 hpyen yen dadang, Hpun Lum Yang, Je yang hpyen yen dabang hte hpyen yen nre ai Myitkyina makau grup yin hkan na nawku hpung ni rai nga ai AG, KBC, KBBC, LBC, RCM nawku hpung na ramma ni yawng marai 40 daram du taw nga sai lam chye lu ai.