Shwegu, Nga Bat Gyi mare na gumshem Myen hpyen dap hpe KIA hte KPDF pawng hpawm hpung ni sa htim gap gasat zing
KIA Masat (3) Dap Ba, Masat (12) Dap Dung ginra, Shwegu Nga Bat Gyi mare na gumshem Myen hpyen dap hpe, October shata 18 ya jahpawt hkying 5:30am aten hta KIA hte KPDF pawng hpawm hpyen hpung ni sa htim gap gasat zing ai lam chye lu ai.
Gumshem Myen hpyen dap Hk.M.Y (602) kata na, Lam Mali Zup makau kaw dap jung nna, hpyen n-gun (30) daram nga ai post hpe KIA hte KPDF pawng hpawm hpyen hpung ni sa htim gap gasat zing ai hta arung arai nkau mung padang dip zing la nhtawm, hpyen dap hpe mung wan nat jahten kau ya ai lam, lit nga ai salang ni kaw na chye lu ai.
KIA Masat (1) Dap Nawng Daju ginra, Mali Ja Pu maga de mung, October shata 18 ya shani gumshem Myen hpyen ni laknak kaba hte hkrup mara gap bun ai hpang, hkying 11:20am aten daram hta gaw, Tada Oo kaw na lung wa ai Jet Fighter nbungli (2) hte bawm wa jahkrat gap gasat kau da ai lam, ginra masha ni kaw na chye lu ai.
October shata 17 ya shani hta mung, Daw Hpum Yang, Hkang Kai Bum kaw nga ai gumshem Myen hpyen Hk.L.Y (142) dap hte Hpun Pyen Bum kaw shara jahkrat nga ai, gumshem Myen hpyen ni, KIA Masat (19) Dap Dung hte Masat (18) Dap Dung ginra maga de laknak kaba gap bun ai lam ni mung nga ai re.
KIO ginjaw ginra, Nam San Yang hpyen man, Lai Lum Awng Ja maga de, Bumre Hka Ya Bum kaw nga ai gumshem Myen hpyen dap ni laknak kaba ni hte shani shagu gap bun nga ai hpe mung chye lu ai.
