Si mai si maw dut ai gat wang shara htawt sit
Man Win Gyi mare kata na si mai si maw dut ai gat wang hpe Man Win Gyi Lahta Tsang Jawng Gawdin Pa kaw shara htawt sit nhtawm, May shata praw kaw nna May shata htum du hkra si mai si maw hte malu masha ni dut gin len ai lam galaw nga sai re hpe chye lu ai.
Covid-19 ana zinli hpe tau nau makawp maga ai hku nna, gat wang hpe masha wuhpung garan nna dut shagun ai lam re.
“Ya htawt sit ai shara kaw gaw si mai si maw hte malu masha ni hpe madung dut ai hku re, bu hpun pa lawng, tsi mawan zawn re ni hpe gaw shawoi na gat de dut shangun ai madung gaw masha wuhpung garan ai lam re” nga nna Man Win Gyi mare Uphkang Salang Hpakawn La Nu tsun ai.
Gat lawk hpe marai langai hte langai hpe pe 6 gang nna dut shangun ai re. Hkamja lam hte seng nna hpaji jaw ningmu jahpaw ndau sha na ai lam, masha pru shang jen jep ai hku nna Man Win Gyi mare de shang wa ai masha ni hpe Facility Quarantine tawn nna hkamja lam ding jep chyoi ya nga ai re lam chye lu ai.
