Si mai si maw dut na gat shara jahkrat hkyen lajang nga
Laiza Muklum, Zup Awng Simsa Ginsup Pa kaw Covid-19 ana zinli hpe tau nau makawp maga ai hku nna, si mai si maw dut mari na matu gat lawk hkrang ni shara jahkrat ai lam hpe April shata 28 ya shani kaw nna Muklum Municipal Makan Dap kawn tatut woi awn hkrang shapraw galaw nga sai re.
Covid-19 Ana Zinli Makawp Ninghkap Komiti kaw nna masing jahkrat ai hte maren, masha hpawng chyawm ai lam hpe shayawm kau lu na matu masing hte galaw sa wa ai lam re.
“Gat wang kata kaw jahkring jahkra gat dut nga ai ni, matsut matsat rai nna gat dut taw nga ai ni yawng mung, ndai aten ladaw laman hta masat da ai gat lawk kaw sa dut ai marang e, masha law law hpawng chyawm ai lam hpe shayawm kau lu na matu, jahkring jahkra gat shara hku gan masat ai lam re” nga nna Laiza Muklum Municipal Du Salang Kaba Nhkum Lum Tu tsun ai.
Masat da sai gat dut shara kaw aten masat da ai lam nnga ai sha, shani shagu gat dut lu na matu lajang da ya ai re. Gat lawk hkrang ni shara jahkrat da sai rai nna, gat dut nga ai kanu kana ni bai lajin wa ai hta hkan nna tatut hkrang shapraw galaw sa wa na re lam, Salang Kaba matut tsun ai.
Covid-19 Ana Zinli Makawp Ninghkap Komiti a matsun kata kaw Laiza Muklum Uphkang Rung hte Miwa hkran Asuya jahkrup nna, Laiza Muklum kata kaw malu masha ra kadawn ai lam nnga hkra, nam law nam lap si mai si maw ni hpe htaw shalai la ai ladat ni hte galaw nga ai re.
Covid-19 ana zinli hpe tau nau makawp maga lu na matu, anhte ginra de ndai ana ndu shang lu na matu Covid-19 Ana Zinli Makawp Ninghkap Komiti a masing kata kaw, gat dut ai kanu kana ni hte mungchying mung shawa yawng jawm ninghkap ai lam galaw yang she ana zinli hpe makawp maga lu na re majaw, ninghkap ai masing hpe jawm galaw nga ga nga nna Salang Kaba kaw nna tsun lajin da ai re.
