Siden Gumshem Myen hpyen dap hpe KIA ni sa htim gap
KIA Masat (2) Dap Ba, Masat (11) Dap Dung ginra, Namti Siden mare kaw dap jung nga ai Gumshem Myen hpyen dap post hpe July shata 31 ya jahpawt hkying 4:00am aten daram hta KIA Masat (11) Dap Dung hpyen hpung ni sa htim gap ai lam chye lu ai.
Lahkawng maga gasat gala majan byin ai hta, Gumshem Myen hpyen dap kaw nna mung, jahpawt hkying 5:30am aten kaw nna hkying 6:30am aten daram du hkra grup yin shara shagu de laknak kaba hkrup mara gap bun ai majaw, Siden mare na dum nta langai kaw laknak si wa hkrat nna asak (50) daram re ai U Moe Kyaw asak si sum mat ai lam, buga masha ni kaw na chye lu ai.
July shata 30 ya jahpawt hkying 4:20am aten hta mung, Namti Maran Kahtawng kaw dap jung nga ai Ts.K.Hk (3) kata na Gumshem Myen hpyen dap gate hpe KIA hpyen hpung ni sa htim gap ai re.
Ya aten Jinghpaw Mung hte Mungmyit Sinli Ga (Kachin Sub-state) ginra ni hta, Wungpawng Mungdan Shanglawt Hpyen Dap (KIA), Kokang MNDAA ni hte Gumshem Myen hpyen dap ni shani shagu ngu na gasat gala majan matut byin nga ai lam chye lu ai.
