Sing Hkan mare kaw Gumshem Myen hpyen dap a nbungli bawm a majaw, mungshawa marai (6) asak si sum nna marai (6) hkala hkrum
Gasat gala majan byin ai lam nnga ai, Manmaw Sing Hkan mare kaw gumshem Myen hpyen dap ni nbungli hte wa gap gasat ai majaw, mungshawa marai (6) asak si sum nna, marai (6) hkala hkrum ai lam chye lu ai.
March shata 17 ya shana maga hkying 7:30pm aten daram hta KIA pawng hpawm hpyen hpung ni zing madu tawn sai, Manmaw Sing Hkan mare kaw gumshem Myen hpyen dap ni nbungli hte wa gap gasat ai majaw, mungshawa marai 6 asak si sum nna, marai (6) hkala hkrum ai lam, ginra masha ni tsun ai.
Asak si sum mat ai mungshawa ni gaw, Daw Wa Wa Hkai asak (54) ning, Toi Tar Win asak (17) ning, Dashi La Seng, Nhkum Sut Htoi Kum Li, Ei Chaw hte mying nchye lu ai salang langai rai nna, hkala hkrum ai marai (6) re ai lam chye lu ai.
Laiwa sai February shata 14 ya shani hta mung, gasat gala majan byin ai lam nnga ai, Sing Hkan mare kaw gumshem Myen hpyen dap ni nbungli hte bawm wa jahkrat bun ai majaw, mungshawa marai (2) asak si sum nna marai (3) hkala hkrum ai lam ni nga sai re.
Ya aten gumshem Myen hpyen dap ni gaw gasat gala majan nbyin ai shara ni hta mung, nbungli drone ni hte hkrum mara gap gasat nga ai majaw, mungshawa dum nta law law hten za nga ai hte mungshawa ni mung asak si sum nga ai re.
