Sinli ginra hta gumshem Myen hpyen dap nbungli bawm wa jahkrat

Mungmyit Sinli Ga (Kachin Sub-state) ginra hta gumshem Myen hpyen dap ni nbungli bawm wa jahkrat bun ai lam chye lu ai.

July shata 12 ya jahpawt Mungmyit Sinli lahta tsang jawng kaw (2), Kunglung lam Asiaword gate kaw (1), gumshem Myen hpyen dap ni nbungli bawm (3) lang wa jahkrat bun ai lam, lit nga ai salang ni kaw na chye lu ai.

Hkying 1:15am hta kalang, 1:22am hta kalang, 1:40am hta kalang bawm wa jahkrat bun ai hta mungshawa hkra hkala ai lam nga nnga nchye lu shi ai re.

Lashio ginra ni hta gasat gala majan laja lana byin nga ai hta mungshawa ni nga ai de laknak kaba si hkrat kapaw ai a majaw, mungshawa ni asak si sum, hkala hkrum ai lam law law nga sai rai nna, ya aten dai ginra na mungshawa ni hpyen koi yen nga ra ai re hpe matut chye lu ai.